ILYO Adamu na Efa babatamfishe mu Edeni, batendeke ukucula. Pa kuti fye basange ifya kulya balingile ukulabombesha. Apo balibatamfishe mu Edeni umwali imiti iisuma iya fisabo, batendeke ukwikala mu mpanga umwalemena imyunga iingi na ficilasa. Ifi e fyacitikile Adamu na Efa lintu bucibusa bwabo na Lesa bwapwile ilyo bakeene ukumumfwila.

Lelo icacililepo ukubipa ca kuti, Adamu na Efa baileteele imfwa. Ibukisha ukuti, Lesa abasokele ati, nga balya icisabo ca ku muti abakeenye ukulyako, bali no kufwa. Kanshi bulya bwine bushiku baliile e lyo ne mfwa yatendeke. Balilufyenye sana pa kukanaumfwila Lesa!

Abana ba kwa Adamu na Efa bonse bafyelwe ninshi Lesa alitamfya kale abafyashi babo mu Edeni. E ico abana babo nabo bali no kulakota no kufwa.

Adamu na Efa abomfwila Yehova, nga baleikala fye bwino pamo na bana babo. Bonse nga baikele umuyayaya pano pene pe sonde ukwabula ukucula. Nga tabalekota no kulwala nangu ukufwa.

Lesa afwaya abantu ukwikala umuyayaya ukwabula ukucula, kabili alaya ukuti bushiku bumo, ico cikacitika. Isonde lyonse likalamoneka bwino sana, e lyo na bantu bonse tabakalelwala. Kabili abantu bonse pe sonde bakatemwana kabili bonse bakaba ifibusa fya kwa Lesa.

Lelo Efa alilekele ukuba cibusa wa kwa Lesa. E ico, alecula pa kukwata abana. Ukukanaumfwila Yehova e kwalengele aleba no bulanda, te fyo?

Adamu na Efa balikwete abana abaume na bana abanakashi abengi. Ilyo umwana wabo uwa kubalilapo afyelwe, bamwinike ati Kaini. Uwa bubili bamwinike ati Abele. Bushe walishiba ifyacitike kuli aba bana?