AFSAED long garen blong Iden, Adam mo Iv i kasem plante trabol. Tufala i mas wok had blong kasem kakae. Tufala i no moa save luk ol naesfala tri we oli karem frut, be tufala i stap luk nomo ol ropnil mo ol narafala rabis gras we oli gru olbaot. Hemia nao samting we i hapen taem Adam mo Iv i no moa obei long God mo taem tufala i no moa stap olsem fren blong Hem.

Be, wan samting we i moa nogud, hemia se Adam mo Iv i mas ded. Tingbaot, God i talem long tufala se sipos tufala i kakae frut blong tri ya, bambae tufala i mas ded. Ale, long stret dei we tufala i kakae frut ya, tufala i stat long rod blong ded. !Tufala i rili krangke blong no lesin long God!

Olgeta pikinini blong Adam mo Iv oli bon afta we God i sakemaot tufala long garen blong Iden. Hemia i min se ol pikinini ya tu oli mas kam olfala mo oli mas ded.

Sipos Adam mo Iv i bin obei long Jeova, tufala mo ol pikinini blong tufala oli save gat wan nambawan laef. Olgeta oli save laef olwe mo glad long wol ya. Oli no save kam olfala, oli no save kasem sik mo ded.

God i wantem yet se ol man oli laef mo oli glad blong olwe, mo Hem i promes se wan dei bambae samting ya i hapen. Bambae ful wol i kam wan naesfala ples, mo olgeta man bambae oli gat wan strong bodi. Mo olgeta man long wol bambae oli fren gud tugeta, mo bambae oli fren gud wetem God.

Be Iv i no moa wan fren blong God. Taswe, taem hem i bonem ol pikinini blong hem, samting ya i had long hem. Hem i harem i soa. ?Yu ting se hem i harem nogud olsem from we hem i no moa obei long Jeova? Yes.

Adam mo Iv i gat plante pikinini, samfala oli boe mo samfala oli gel. Taem faswan boe blong tufala i bon, oli putum nem blong hem se Ken. Tufala i putum nem blong seken boe blong tufala se Ebel. ?Wanem i hapen long tufala boe ya? ?Yu yu save stori blong tufala ya?

Jenesis 3:16-23; 4:1, 2; Revelesen 21:3, 4.