Maana 5nan

Gɛlɛya daminɛna

HADAMA ni Hawa gɛnna ka bɔ Edɛn nakɔ kɔnɔ tuma min na, u ye gɛlɛya caman sɔrɔ. U tun ka kan ka baara gɛlɛn kɛ walisa k’u ka balo sɔrɔ. U tun ɲɛ tɛ jiri cɛɲiw la tun u lamini na. U tun ɲɛ bɛ ŋɔniw ni binjugu caman de la sisan. O kow de ye Hadama ni Hawa sɔrɔ katuguni u ma Ala ka kuma mɛn, ani ko u ye teriya tiɲɛ u ni Ala cɛ.

Nka, min juguyara ka tɛmɛ a bɛɛ kan, o ye ko u tun tɛ se ka to ɲɛnamaya la kudayi tun. I hakili b’a la ko Ala tun ye kangari da u ye, ko ni u ye jiri dɔ den dun, u tun bɛna sa wa? O kosɔn, k’a ta don min yɛrɛ la u ye o jiriden dun, u y’a daminɛ ka kɔrɔ dɔɔnin-dɔɔnin, fo a laban na, u sara. Hadama ni Hawa ma Ala ka kuma mɛn minkɛ, o kɛra u bolo hakilintanya belebeleba ye.

Hadama ni Hawa gɛnnen kɔfɛ ka bɔ Edɛn nakɔ kɔnɔ, u ye denw sɔrɔ. O kɔrɔ ye ko Hadama ni Hawa denw fana bɛna kɔrɔ, ka sa.

Ni Hadama ni Hawa tun ye Jehova ka kuma mɛn dɔrɔn, olu ni u denw tun bɛna u ka ɲɛnamaya kɛ hɛrɛ la. U bɛɛ tun bɛna se ka balo  hɛrɛ la kudayi dugukolo kan. Mɔgɔ si tun tɛna kɔrɔ, mɔgɔ si tun tɛna bana, mɔgɔ si tun tɛna sa.

Ala b’a fɛ mɔgɔw ka balo hɛrɛ la kudayi. A ye layidu ta ko o bɛna kɛ don dɔ la. Dugukolo kuuru bɛɛ tɛna cɛɲɛ dɔrɔn dɛ, nka mɔgɔw bɛɛ fana bɛna kɛnɛya. Teriya bɛna kɛ mɔgɔw ni ɲɔgɔn cɛ, ani teriya bɛna kɛ mɔgɔw ni Ala cɛ.

Nka, Hawa tun tɛ Ala teri ye tun. O de y’a to a tɔrɔla kosɛbɛ a ka denwolo la. A ye denw wolo dimin kɔnɔ. Hawa ma sɔn ka Jehova ka kuma mɛn minkɛ, o ye dusukasi caman lase a ma. O tɛ tiɲɛ ye?

Hadama ni Hawa ye denkɛ ni denmuso caman sɔrɔ. U denkɛ fɔlɔ wolola tuma min na, u y’a tɔgɔ da ko Kaɛn. U ye u denkɛ filanan tɔgɔ da ko Abɛl. Mun ye o den fila sɔrɔ? I bɛ o dɔn wa?

Jenɛse 3:16-23; 4:1, 2; Jirali 21:3, 4.