ADÁN, Eva bogwa Edén neg yeerdaglegedgi onolesad sorbali, ega negbeedse guali. Ise arbaar alamagnai guer gebmala nabir mas gunned amigega. Auggine, sabbimar nabir e san gullemalad anale agga iggomala geb gagan iggobimaladi agnide. We ibmar gusa Adán, Eva bogwa Babdummadba ibsassurmargua geb bar E aimar gala gussurmala.

Ugginbali, Adán, Eva bogwa burgwidmarbali. Be ebinsae: Babdummad wemarga sogsad, sabbi wargwen e san gudsamalale, burgwemaloye. We sabbi san gudsamargua aa ibagi burgwidmarsunna. ¡Babdummad iddossurmalad bali, ibmar wissurmaladyob gusmala!

Adán, Eva bogwa neg yeerdaglegedgi onolesad sorbali, e mimmigan gwalulesmala. Degisoggua, anba e mimmigan seredgusmarmoga geb burgwismarmoga.

Adán, Eva bogwa Jehová sogedba ibmar imasmalana, yeeriddodii gudigumaloena geb e mimmigan anba deyob yeeriddodi gudigumarmogoena. Nabbaneggi yeeriddodii sadegu gudigumaloena. Dule wargwensaar seredguosulina, uelegosulina, geb burgosurbalina.

Babdummad abege dulemar sadegua yeeriddodii gudigumaladi, geb anmarga soge ibagwengi deyob guoye. Unnila Nabbanegbii bergwable yeerdagle guosuli, ar bergwable dulemar bur san nued niggumaloe. Geb bergwable dulemar na aimargibii gumaloe, geb Babdummad aimarga gumarbaloe.

Eva dina bar Babdummad aya suli. Aaga ibgwensur ega gussuli goe nigguedi. Ibmar nunmagged abargi goe niggusa. Nabiri, Jehová sogedba ibsassulidba nunmagged dummad ega nossunna, ¿degi be dagsursi?

Adán, Eva bogwa buggidar mimmigan niggusmala, masmala niggusmala geb bunamala niggusmarbali. E massi sagla gined gwalulenonigua onugsasmala Caín. Geb e massi sorbalid onugsasmala Abel. ¿Be wisi wemar igi gusmala?