ENA taudaku ni were o Iteni, e levu sara na leqa erau sotava o Atama kei Ivi. Erau na cakacaka vakaukaua me rau kana kina. Sa na sega na kau vuata totoka, sa na kedra isosomi ga na kau vakavotona kei na soni. E yaco oqo baleta ni rau talaidredre vua na Kalou o Atama kei Ivi, sa tagutuvi tale ga e kea na nodratou veiwekani vinaka.

Ia o koya a qai ca sara, ni rau sa tekivu mate yani vakamalua. Nanuma tiko ni a kaya na Kalou vei Atama kei Ivi ni rau na mate kevaka erau kania na vuata mai na dua na vunikau. Mai na siga sara ga erau kana kina, oqori tale ga na siga erau sa tekivu mate kina vakamalua. Rau sa lialia dina ni rau sega ni vakarorogo vua na Kalou!

Era qai sucu kece ena taudaku ni were o Iteni na luve i Atama kei Ivi, ni sa vakatalai rau tani na Kalou. Kena ibalebale oqo nira na tubucake tale ga mera qase o ira na gone oya ra qai mate.

Kevaka me rau a talairawarawa vei Jiova o Atama kei Ivi, ke rau a bula mamarau tu ga vaka kina o ira na luvedrau. Ke a rawa nira bula tawamudu kece ena marau e vuravura. Ena sega na qase, tauvimate, kei na mate.

E vinakata na Kalou meda bula tawamudu ena mamarau na tamata, qai yalataka tu ni na yaco dina oqori ena dua na siga. Ena sega wale ga ni rairai totoka na vuravura taucoko, ia na tamata kece era na bulabula. O ira kece e vuravura era na veitokani vinaka, ra qai veitokani vinaka tale ga kei na Kalou.

Ia rau sa sega ni veitokani tale kei na Kalou o Ivi. Sa sega kina ni rawarawa vua na vakasucu. E vakila na mosi. O koya gona, eda raica e ke ni sotava o koya na rarawa levu baleta ga ni a talaidredre vei Jiova.

E levu na luvedrau tagane kei na yalewa o Atama kei Ivi. Ni sucu na luvedrau ulumatua, erau vakayacani koya me o Keni. Na ikarua ni luvedrau erau vakayacana me o Epeli. Na cava e qai yacovi rau? O kila beka?