EVA obọ otafe ogege Idẹn, Adamu avọ Ivi a wo ikpokpoma buobu. A re ru iruo egaga re a te wo emu. Ukpenọ a wo ire ibi iwowoma, kọ enwẹnwẹ gbe idhigbo eye idi wariae họ. Ona họ oware nọ o via oke nọ Adamu avọ Ivi a ghọẹmeeyo kẹ Ọghẹnẹ, a tẹ se egbẹnyusu Riẹ ba ẹjọ.

Rekọ mai yoma na, Adamu avọ Ivi a te muhọ ewhuo. Kareghẹhọ nọ Ọghẹnẹ ọ vẹvẹ e rai unu nọ ae a re whuẹ otẹrọnọ ae a re ubiure jọ. Whaọ, ẹdẹdẹ nọ a re a te muhọ ewhuo. Ẹvẹ ae a ghẹ te nọ a gbẹ gaviezọ kẹ Ọghẹnẹ hẹ!

A yẹ emọ Adamu avọ Ivi kpobi eva oke nọ Ọghẹnẹ o le ọsẹ gbe oni rai no ogege Idẹn no. Onana u dhesẹ nọ emọ rai re e rẹ whoa a ve je whu.

Ohẹ jọ nọ Adamu avọ Ivi a yoẹme kẹ Jihova, uzuazọ o hẹ vọ avọ oghọghọ kae gbe emọ rai. Ai kpobi a hẹ ria bẹdẹ bẹdẹ avọ oghọghọ eva otọakpọ. Ohwo ọvuọvo ọ hẹ who, mọ ẹyao, hayo whu hu.

Ọghẹnẹ ọ gwọlọ nọ ahwo a ria bẹdẹ bẹdẹ eva oghọghọ, yọ Ọ ya nọ ẹdẹ jọ a ti ru ere. Otọakpọ na kpobi o te jọ wowoma ọvo ho, rekọ ahwo a ti wo oma okpokpọ re. Yọ kohwo kohwo eva otọakpọ ọ rẹ te jọ omamọ ogbẹnyusu kugbe ohwo kpobi je kugbe Ọghẹnẹ.

Rekọ Ivi ọ gbẹ jọ ogbẹnyusu Ọghẹnẹ hẹ. Fikiere nọ o je yẹ emọ riẹ, o gbẹ jọ lọlọhọ kẹe he. O wo edada. Ẹme ọ seba eyo kẹ Jihova ọ wha uweli ulogbo lele oma, u mu owhẹ ẹro?

Adamu avọ Ivi a wo emezae gbe emetẹ buobu. Nọ a yiẹ ọmọzae ọsosuọ rai, a te se odẹ riẹ Keni. A se odẹ ọmọzae avivẹ rai Ebẹle. Eme ọ via kae? Whọ riẹ?