NAABʼAL li chʼaʼajkilal kichalk saʼ xbʼeenebʼ laj Adan ut xʼEva naq keʼisiik saʼ li chʼinaʼusil naʼajej. Keʼok chi kʼanjelak chi kaw re naq teʼwanq xtzakahemq. Moko keʼril ta chik chaabʼil cheʼ, kaʼaj chik pim ut kʼix keʼxtaw. Chixjunil aʼin keʼxkʼul, xbʼaan naq keʼxqʼet Raatin li Yos ut keʼxkanabʼ ajwiʼ wank choʼq Ramiiw.

Ma nakaanaw kʼaru keʼok xkʼulbʼal laj Adan ut xʼEva? Keʼok chi kamk. Ma jultik aawe naq li Yos kixye rehebʼ naq teʼkamq wi teʼxlow ru li cheʼ? Saʼ li kutan ajwiʼ aʼan naq keʼxlow ru li cheʼ keʼok chi kamk. Naq inkʼaʼ keʼxpaabʼ li Yos keʼxkʼutbʼesi naq maakʼaʼebʼ xnaʼlebʼ.

Moko wankebʼ ta chik laj Adan ut xʼEva saʼ li naʼajej Eden naq keʼyoʼlaak chixjunilebʼ xkokʼal. Joʼkan naq keʼok chi tiixk ut chi kamk.

Wi laj Adan ut xʼEva keʼxpaabʼ raj li Yos, aʼanebʼ ut ebʼ li ralal xkʼajol sahebʼ raj saʼ xchʼool ut keʼwank raj xyuʼam chi junelik saʼ Ruuchichʼochʼ. Maaʼani raj kicheekoʼk, kiyajerk chi moko kikamk ta raj.

Li Yos naraj naq twanq qayuʼam chi junelik. Naraj naq chʼinaʼusaq chixjunil li Ruuchichʼochʼ ut maakʼaʼaq chik li yajel. Li Yos naraj ajwiʼ naq chixjunilebʼ teʼwanq choʼq Ramiiw ut teʼwanq saʼ amiiwil chiribʼilebʼ ribʼ. Joʼkan naq twulaq xqʼehil naq li Yos tixbʼaanu chixjunil aʼin.

Li xʼEva kixkanabʼ wank choʼq Ramiiw li Yos. Joʼkan naq saʼ rahilal ut raasa keʼyoʼlaak li ralal xkʼajol. Naabʼal li rahilal kixkʼul xʼEva xbʼaan naq kixqʼet Raatin li Yos.

Naabʼalebʼ ralal xkʼajol keʼwank laj Adan ut li xʼEva. Li xkʼabʼaʼ li xbʼeen ralal aʼan aj Cain ut li xkabʼ aj Abel. Ma nakaanaw, kʼaru keʼxkʼul laj Cain ut laj Abel?