NJA ya mũgũnda wa Edeni, Adamu na Hawa maarĩ na mathĩna maingĩ. No mũhaka mangĩarutire wĩra mũritũ nĩguo mone irio. Handũ ha mĩtĩ mĩthaka ya matunda, monire mĩigua ya mĩthemba mĩingĩ ĩgĩkũra kũndũ guothe. Ũguo nĩguo kwahaanire rĩrĩa Adamu na Hawa maremeire Ngai na magĩtiga gũtuĩka arata Ake.

Gũthũkia mũno-rĩ, Adamu na Hawa makĩambĩrĩria gũkua. Ririkana, Ngai aamerĩte nĩmagakua mangĩarĩire matunda ma mũtĩ ũrĩa wa mwanya. Kwoguo-rĩ, mũthenya oro ũcio marĩire makĩambĩrĩria gũkua. Kaĩ maarĩ aritu-ĩ nĩũndũ wa kwaga gũthikĩrĩria Ngai!

Ciana ciothe cia Adamu na Hawa ciaciarirũo thutha wa Ngai kũrutũrũra aciari ao mũgũnda-inĩ wa Edeni. Ũguo nĩ ta kuuga atĩ ciana o nacio nĩingĩakũrire na ikue.

Korũo Adamu na Hawa nĩ maathĩkĩire Jehova-rĩ, mũtũũrĩre wao na ciana cio ũngĩarĩ wa gĩkeno. Othe mangĩatũũrire na gĩkeno tene na tene gũkũ thĩ. Gũtirĩ mũndũ o na ũmwe ũngĩakũrire, arũare kana akue.

Ngai endaga andũ matũũre tene na tene marĩ na gĩkeno na nĩ Eranĩire atĩ mũthenya ũmwe ũndũ ũcio nĩ ũrĩhinga. To thĩ iki tu ĩgakorũo ĩrĩ thaka, ĩndĩ andũ othe magakorũo na ũgima mwega wa mwĩrĩ. Mũndũ o wothe thĩinĩ wa thĩ agakorũo arĩ mũrata mwega, ningĩ akorũo arĩ mũrata wa Ngai.

Hawa ndacokire gũtuĩka mũrata wa Ngai rĩngĩ. Nĩũndũ ũcio-rĩ, rĩrĩa aciarire ciana ciake, ndwarĩ ũndũ mũhũthũ. Aarĩ na ruo. Hatarĩ nganja kwaga gwathĩkĩra Jehova nĩ kwamũreheire kĩeha kĩingĩ, kana tiguo?

Adamu na Hawa nĩmaaciarire anake na airĩtu aingĩ. Mwanake wao wambere aciarũo-rĩ, makĩmũtua Kaini. Magĩtua mwanake wao wa kerĩ Habili. Thutha ũcio-rĩ, ũhoro wao wahaanire atĩa? Wee-rĩ, nĩ ũĩ?