ZINGU kia Adami yo Eva kumbazi a mpatu a Edene kiampasi kiakala. Bafuntukanga kwayingi muna kala yo madia. Vana fulu kiamenanga nti miyimanga bundu yambote, nsende ye nkeka za mfinda zabamenena. Idiau diabwa vava Adami yo Eva bakolamena Nzambi yo lembi kala diaka akundi Andi.

Edi diasund’o yiva, Adami yo Eva bayantik’o fwa. Sungamena dina kabavovesa Nzambi vo fwa befwa ovo badidi bundu kia nti wauna. Bayantik’o fwa muna lumbu kina badia kio. Nkia kizowa bavanga mu lembi lemvokela Nzambi!

Wana awonso a Adami yo Eva kumbazi a mpatu a Edene bawutukila. Disongele vo oyau mpe benuna yo fwa.

Kele vo Adami yo Eva balemvokela Yave zingu kiau ye kia wan’au kiakiese kiadi kala. Badi zinga ye kiese ova ntoto yakwele mvu. Ke vadi kala mosi ko wadi nuna, yela yo fwa.

Nzambi ozolele vo wantu bazinga ye kiese yakwele mvu. Osidi nsilu vo besinga zinga. Ke ntoto kaka ko ukituka se fulu kiambote, kansi wantu awonso mpe bekala yo vimpi wambote. Bekala s’akundi yau yo yau ye kwa Nzambi.

Kansi, Eva kasidi kala diaka nkundi a Nzambi ko. Ke diakala dia sazu ko vava kawuta o wana. Mpasi kamonanga. Nga kukwikidi ko vo kolamena Yave ntantu zayingi diantwasila?

Adami yo Eva wana ayingi bawuta. Mwan’au antete wayikilwa vo Kaini. Ona wazole bamvana nkumbu vo Abele. Ng’ozeye dina diababwila?