PANJA pa budimi bwa Edena, ba Adama ne Eva bādi kebamone malwa. Bādi bafwaninwe kwingila bininge mwanda wa kusokola bidibwa. Pa kyaba kya mityi ya bipa biyampe, bādi ke bajokolokelwe na miba ne pimbye. Kino kyo kyāfikile ba Adama ne Eva pobāpelele kukōkela Leza, kebākidipo balunda nandi.

Kibi kutabukidila, ba Adama ne Eva bāshilwile kufwa. Vuluka, Leza wēbadyumwine’mba bakafwa shi badye ku kipa kya mutyi. Bine, tamba mu dine difuku dyobādile’ko’dya, bāshilwile kufwa. Bine bwādi bulembakane pa kupela kwimvwana Leza!

Bana bonso ba Adama ne Eva bābutwilwe kupwa kwa Leza kupanga bambutwile babo mu budimi bwa Edena. Kino kishintulula’mba bana nabo bādi bafwaninwe kununupa ne kufwa.

Shi ba Adama ne Eva bākōkele Yehova, longa būmi bwabo ne bwa babo bana i bwa nsangaji. Longa bonso bekele na būmi bwa nyeke mu nsangaji pano pa ntanda. Kadi longa i kutupu muntu nansha umo ununupa, ubela ne kufwa.

Leza usakanga bantu bekale na būmi bwa nyeke mu nsangaji, ne i mulaye’mba difuku dimo bakekala nabo. Ke enkapo ntanda yonso ikekala miyampe, ne bantu bene bakekalanga na bukomo bwa ngitu. Muntu yense pano pa ntanda ukekalanga mulunda muyampe na muntu mukwabo ne na Leza.

Ino Eva kākidipo kadi mulunda na Leza. O mwanda wādi kakolelwa pa kubutula bana. Wādi umvwana bisanso. Kubulwa kukōkela Yehova kwāmuletele bulanda bukatampe, mwene i amo?

Ba Adama ne Eva bābutwile bana-balume ne bana-bakaji bavule. Pābutwilwe wabo mwana umbajinji, bāmwinikile bu Kena. Mwana wa bubidi bāmwinika bu Abele. Ino i kika kyēbafikile? Lelo wikiyukile?