Chihande 5

Kuyanda Nachiputuka

KUWELUKA wamilemba yaEtene, vaAlama naEve vamwene vihuli vyavivulu. Kulya chavo chapwile chakuyanjila. Mitondo yasokelenga shina yamingonga namituvapoko, keshi yamihako yamwazako. Chikiko chasolokele omu Alama naEve vahonene kwononokela Kalunga nakuhona kupwa masepa Jenyi.

Jino kuvindama chachinene, Alama naEve vaputukile kufwa. Nawanuka, Kalunga avalwezele ngwenyi navakafwa kachi nge navakalya kumutondo umwe. Eyo, likumbi valile likiko vene likumbi vaputukile nakufwa. Owo uleya kana valingile hakuhona kwivwilila Kalunga!

Vana vaAlama naEve vosena vasemukile hanyima yakuhanga visemi vyavo mumilemba yaEtene kuli Kalunga. Echi chili nakulumbununa nge navana navakivo navakashinakajiwanga nakufwa.

Nge Alama naEve vononokelele Yehova, kachi kuyoya chavo nachavana vavo chapwile chamwaza. Kachi vosena vatwalileho nakutwama myaka yosena hamavu nakuwahilila. Kachi naumwe pimbi atelele kushinakajiwa, kuviza chipwe kufwako.

Kalunga asaka vatu kutwama haya myaka yosena nakuwahilila, kaha Ashika nge mukiko munachikapwa kulutwe. Mavu osena nawakakupuka, kaha vatu vosena navakapwa vakulikangula kumijimba. Mutu himutu hamavu mwakapwa sepa lyaKalunga navatu vosena.

Oloze Eve kapwile cheka sepa lyaKalungako. Shikaho hakusema vana, apwilenga nakumona ukalu. Evwilenga misongo. Enga, kuhona kwononoka Yehova chikiko chamunehelele chikupu ushona, nyi chiku?

Alama naEve vapwile navana vavavulu vamalunga navava vamapwevo. Omu asemukile mwanavo watwatwa, vamulukile ngwavo, Kena. Mwanavo wamuchivali vamulukile ngwavo, Avele. Vyuma vika vyavasolokelele? Unatachikiza tahi?

Kuputuka 3:16-23; 4:1, 2; Kusoloka 21:3, 4.