MPANJI 5

Chihandilu chaMakabi Chinatachiki

KUNSA yetempa daEdeni, Adama naEvu adiña mwihuñu deneni. Chiña akalakala nañovu mwaka awani yakudya. Chatela nyitondu yanyikabu yayiwahi yimeneña, ilaña amweni nyiña ninyisonsonyi hiyikumena mwejima. Ichi dichayimwekeneni Adama naEvu hampinji yabuliliwu kumwovwahila Nzambi nawa niwubwambu wawu naNzambi wamanini.

Ilaña chuma chabadikili kutama, Adama naEvu atachikili kufwa. Anukaku, Nzambi wayilejeli nindi akafwa neyi adya kumukabu wamutondu wumu. Mwamweni, dodenodu ifuku dadiliwu kumukabu, atachikili kufwa. Owusupi weliliwu hakubula kumutiyilila Nzambi!

Anyana kaAdama naEvu ejima asemukili henohu anvwali jawu ayihañamu dehi mwitempa daEdeni kudi Nzambi. Ichi chinakulumbulula nawu anyana niwena akushinakaja nakufwa.

Chihandilu chawu nawanyanawu chadi kwikala chamuzañalu neyi chakwila Adama naEvu amwovwahilili Yehova. Wonsu wawu adikushakama namuzañalu haya nyaka hanu hamaseki. Chiña kwosi muntu niwumu wadikushinakajaña nikukata hela kufwaku.

Nzambi nakukeña antu kushakama haya nyaka namuzañalu, nawa Nashiki nindi mpinji yakumbidi akashakama amuzañalu. Bayi neyi iseki dejima didakawaha hohuku, ilaña niantu ejima akekala akola kumujimba. Cheñi nawa antu ejima hamaseki akekala nawulunda waweni nawantu ejima niNzambi hamu.

Hakwila Evu hekalili cheñi ibwambu daNzambiku. Dichi dinu hakuvwala anyanindi, hichadiña chaswayi kudi yenaku. Watiyileña nyisoñu. Kubula kumwovwahila Yehova kwamuleteleli yihuñu yayeni, hidimuku?

Adama naEvu adiña nawanyana amavulu awamayala niawambanda. Chasemukiliyi mwanawu weyala wawedi, amutumbili nawu Kena. Chilondela wedi amutumbili nawu Abeli. Chumanyi chayimwekeneni? Wunachiluki?

Kutachika 3:16-23; 4:1, 2; Chimwekeshu 21:3, 4.