TIʼJXI tbʼanel najbʼil Edén, e ok weʼ Adán tukʼe Eva twitz nim mya bʼaʼn. O chi aqʼunan wen tuʼn kywaʼn. Oʼkx chʼiʼx jaw chʼiy twitz Txʼotxʼ ex nya aʼyejo tbʼanel tzeʼ. Bʼaj jlu tuʼnjo mitiʼ okx kybʼiʼn Adán tukʼe Eva tkawbʼil Dios ex mitiʼtl e ok te Tamiw.

Aju mya bʼaʼn twitz tkyaqil jlu, aju e tijen ex e kyim. Naʼntza: Xi tqʼamaʼn Dios kye qa chi kyimeltaq qa ma txi kyloʼn twitz tzeʼ. Atxix tej t-xi kloʼn twitz tzeʼ tzaj tzyet tuʼn kytijen ex tuʼn kykyim. ¡Mya bʼaʼn xjalqeʼ tuʼnjo mitiʼ okx kybʼiʼn tkawbʼil Dios!

Tzmaxe e ul itzʼji tkʼwaʼl Adán tukʼe Eva tej otaqxi chi etz lajoʼn toj tbʼanel najbʼel te Edén. Tuʼntzunjo, ax ikx qeʼ tkʼwal Adán tukʼe Eva okteq chi tijel ex chi kyimel.

Noqwit okx kybʼiʼn Adán tukʼe Eva Jehová, e anqʼinwtlo toj tzalajbʼil kyukʼe kykʼwaʼl. Ax ikx e anqʼinwtlo te jumajx twitz Txʼotxʼ. Mi aʼlwitlo jun tijen, mi aʼlwitlo jun yabʼti ex mi aʼlwitlo jun kyim.

Tajbʼil Dios tuʼn kyanqʼin xjal te jumajx tuj tzalajbʼil, ntzaj ttziyen qa kjapunelbʼaj twiʼ jlu. Nya oʼkx kʼokil Txʼotxʼ te tbʼanel najbʼil ax ikx melay chi yabʼtitl xjal. Ex kykyaqil kokel kyamiwen kyibʼ, ax ikx chi okel te tamiw qMan Dios.

Nya tamiwteqtl Dios Eva. Tuʼntzunju, kwest e ul itzʼje tal, ex tukʼe tkʼixkʼojil. Tuʼnjo mitiʼ okx tbʼiʼn Eva tkawbʼil Jehová, ul tiʼn nimxix kʼixkʼoj tuj tanqʼibʼil, ¿nyapelo ikjo toj twitza?

E ten nim tkyʼajal ex tmeʼl (tmyal) Adán tukʼe Eva. Tej tul itzʼje tnejil tkʼwal Adán tukʼe Eva, Caín tbʼi ok kyqʼoʼn. Atzunjo tkabʼ, Abel tbʼi ok kyqʼoʼn. ¿Ojtzqiʼn tuʼne tiʼ tzaj kyiʼj jlu?