KO JA Adán mëdë Eevʉ ojts yajkajxpëtsëëmnëdë jam Eden, ta net mëjwiin kajaajë amay jotmay tmëdäjttë. Mëk tyuundë ets nyayajkääjy nyayaˈukëdë. Ets mä jyapäätyëty myuxët ja ääjy kepy diˈib yajkypyë jeˈxy peky, yëˈë mujxë apyny xitsoo yatsoo. Tyuun jyäjtë dëˈën mët ko ja Adán mëdë Eevʉ kyaj tmëmëdoodë Dios. Ets kom kyaj tmëmëdoodë ta kyaj mëët nyekynyaymyaayëdë.

Per diˈibën mas ayoˈon, yëˈko ja Adán mëdë Eevʉ kuanë nety yˈooganëdë. Jamyats ko Dios yˈanmääyëdë ko ooktëp pën jyëˈxtëp ja ujts tëëmp. Pes ja xëë mä ojts tjëˈxtë, ja xëë myëjäˈäyëtsyondaktë axtë ko ojts yˈoˈknëdë. ¡Mëkë dëˈën tsyuuˈäjttë ko tkamëmëdoodë Dios!

Niˈamukë yˈuˈunk yˈënäˈk ja Adán mëdë Eevʉ jaanëm myaxuˈunkˈäjttë mä nety të yaˈëxkajxnëdë jam Eden. Pääty ja yˈuˈunk yˈënäˈk seguurë ko nety nandëˈënë myëjäˈäyëdët ets yˈooktët.

Koxyëbë Adán mëdë Eevʉ tmëmëdooyë Jyobaa, agujk jotkujkxyëp jyukyˈäjttë mëdë yˈuˈunk yˈënäˈk. Winë xëë winë tiempëxyëp jyukyˈäjttë ets agujk jotkujk yä Naxwiiny. Nipënxyëp kyapäˈämbejty kyamëjäˈäyë ets kyaˈoˈky.

Dios tsyojkypy etsë jäˈäy jyukyˈatët winë xëë winë tiempë ets agujk jotkujk, ets wyandakypy ko jäˈtäämbë tiempë mä dëˈën tyunäˈäny jyatäˈänyëty. Kyaj jeˈeyë Naxwinyëdë jyëmbitäˈäny tsuj, nandëˈën niˈamukë jäˈäy oy mëk yajpäädäˈändë. Ets nyaymyayäˈänëdë nixim niyam ets nandëˈën mëdë Dios.

Perë Eevʉ kyaj nety mëdë Dios nyekynyaymyayëty. Pääty nimëjääjë yˈuˈunk yˈënäˈk dyajmaxuˈunkˈäjty, mëdë pëjk adoˈonën. Mët ko tkamëmëdooyë Jyobaa, mëjwiin kajaa tyukmiinë jäj jëmuˈumën, ¿këdiijë?

Adán mëdë Eevʉ tmëdäjttë mayë myäänk etsë nyëëx. Ko myaxuˈunkˈäjty ja tim jawyiimbë myäänk, txëëmooytyë Kaín. Ets ja myëmajtskpë myäänk txëëmooytyë Abel. ¿Mnijäˈäp ti tyuundë ko ojts yaˈknëdë?