TA̱ Adán xíʼin ñá Eva tá ke̱ena nu̱ú ñuʼú Edén, ku̱a̱ʼá tu̱ndóʼo ki̱xi nu̱úna. Chi kán ki̱xaʼána káchíñu ku̱a̱ʼákana ña̱ va̱ʼa kuxuna. Tá xi̱ndoona ñuʼú livi kán nina yitu̱n ku̱i̱ʼi xi̱nina xa̱ʼnu nu̱úña, tándi̱ʼi ke̱ena nu̱úña nina yitu̱n iñú xíʼin tú yuku̱ xi̱nina xa̱ʼnu. Ndo̱ʼona ña̱yóʼo xa̱ʼa ña̱ kǒo níxiniso̱ʼokana ña̱ ni̱ka̱ʼa̱n Ndióxi̱ ta ni va̱ása níxi̱yokana migora.

Ta su̱ví ña̱kán kuití níxi̱yo nu̱úna ta ki̱xaʼá loʼo tá loʼo ndúchéena ta tándi̱ʼi ni̱xi̱ʼi̱vana. Ndakaʼún chi Ndióxi̱ ni̱ka̱ʼa̱nra xíʼinna tá ná kaxína ku̱i̱ʼi ña̱ ni̱ka̱ʼa̱nra xíʼinna kǒo kaxína kuvina káchira xíʼinna. Míí ki̱vi̱ xa̱xína ku̱i̱ʼi kán loʼo tá loʼo ndu̱chéena ta tándi̱ʼi ni̱xi̱ʼi̱vana. Tá níxiniso̱ʼona ña̱ ni̱ka̱ʼa̱n Ndióxi̱ kǒo kundoʼona ña̱yóʼo.

Tá ta̱vá Ndióxi̱ ta̱ Adán xíʼin ñá Eva nu̱ú ñuʼú livi saáví ki̱xaʼá káku se̱ʼena. Ña̱yóʼo kúni̱ kachiña ndiʼi se̱ʼena nduchéena tasaá kuvina.

Tá níxiniso̱ʼo ta̱ Adán xíʼin ñá Eva ña̱ ni̱ka̱ʼa̱n Ndióxi̱ xíʼinna, si̱íní kundoona xíʼin se̱ʼena. Tasaá kivi kutakuna ndiʼi tiempo nu̱ú Ñuʼú yóʼo, ta kǒo kuvina chi va̱ása kani kue̱ʼe̱ miína ni va̱ása nduchéena.

Ndióxi̱ kúni̱ra ndiʼi na̱ yiví si̱íní ná kundoona nu̱ú Ñuʼú yóʼo ndiʼi tiempo, ta káʼa̱nra kixa̱a̱ iin ki̱vi̱ ña̱ saá xa̱a̱ña kooña. Ta su̱ví nina Ñuʼú yóʼo kuití livi koo, ndiʼi na̱ yiví vií koona chi kǒoka kue̱ʼe̱ koo. Ta va̱ʼa kundoo xíʼin táʼanna ta ndiʼina xa̱a̱na koona migo Ndióxi̱.

Soo ñá Eva kǒo níxikukañá migo Ndióxi̱. Ña̱kán xi̱xoʼviñá tá xi̱kaku se̱ʼeñá. Xa̱ʼa ña̱ kǒo níxiniso̱ʼoñá ña̱ ni̱ka̱ʼa̱n Ndióxi̱, ku̱a̱ʼání tu̱ndóʼo ki̱xi nu̱úñá.

Ta̱ Adán xíʼin ñá Eva ku̱a̱ʼá se̱ʼena ni̱xi̱yo, ni̱xi̱yo ná si̱ʼí xíʼin ta̱a. Ta̱ se̱ʼe nu̱úna xi̱naníra Caín, ta̱ u̱vi̱ xi̱naníra Abel. ¿Á xíni̱ún ndáaña ndo̱ʼo ta̱ Caín xíʼin ta̱ Abel?