HAMBANDZA ya citungu ca Endene, va Andama na Eva va muene visoti via vingi. Va pandele ku fuitangana cikuma linga va uane via-ku-lia. Mavu tele nga eku sokele miti ya vusuka vua cili, vunoni va muene luvimbimbo na tundzata ku soka mu musenge uose ua va zingilikile. Evi vikevio via solokele omo va Andama na Eva va muesele lisino kuli Njambi kaha vusamba vuavo na Njambi vua lengele.

Ku vindama cikuavo ca kama ci va muene va Andama na Eva, ka va hasele naua ku yoya miaka yose. Vuluka nguove, Njambi ua va mamuine ngueni nga va ka lia ku vusuka vua umo muti va ka tsa. Litangua lize vene li va lile ku vusuka vuaco va putukile ku kulupa kamandende kamandende kaha va tsile. Va lingile vusiname vua kama mu ku viana ku halakana kuli Njambi!

Vana va Andama na Eva va semukile tele Njambi na sekula laza visemi viavo mu citungu ca Endene. Eci ca lomboloka ngecize vana navo va pandele ku kulupa na ku-tsa.

 Nga va Andama na Eva vononokele kuli Yehova, nga va yoyele mu ndzolela hamo na vana vavo. Nga vose va yoyele miaka yose mu ndzolela ha mavu. Na umo uahi ue ku kulupile, ku vavala ni kutsa.

Njambi a tonda ngueni vantu va yoye mu ndzolela miaka yose, ua kulahesa ngueni tangua va ka yoya muono ua cifua eci. Kati lika mavu ose a ka pua a cili, vunoni vantu vose va ka kala na cihindu. Kaha muntu uose a ka likuata vusamba na uose-ouo kaha na Njambi.

Vunoni Eva ka puile naua kavusamba ka Njambi. Ngeci mua semene vana veni, ka ca puile ca casi kuli ikeye. Ua vuile ku vavala. Ku muesa lisino kuli Yehova ca mu kokelele ku vindama ca kama, ni vati?

Va Andama na Eva va semene vana va vengi va vampuevo na vavamala. Mua semukile muanavo ua ku livanga, va mu lukile nguavo Kaini. Kaha ua mu civali va mu lukile nguavo Avele. Vika via va solokelele? Ua vi tantekeya ni?