I FAFO he katene i Etena, ne loga lahi e tau lekua ha Atamu mo Eva. Kua gahua lahi a laua ke moua e tau mena kai. Ti nakai kitia e laua e tau akau fua fulufuluola, ka e loga e akau mahukihuki mo e talatala kua tutupu viko ia laua. Pehēnei e mena ne tupu ha kua liuliu a Atamu mo Eva ke he Atua ti fakaoti ai e kapitiga mo Ia.

Ka ko e mena ne mua atu e kelea, ne kamata agataha a Atamu mo Eva ke mamate. Manatu, ne hataki he Atua to mamate a laua ka kai e fua he akau pauaki. Ti ko e aho ne kai ai e laua, ne kamata a laua ke mamate. Ko e goagoa ha ia ha laua he ai fanogonogo ke he Atua!

Ko e tau fanau oti ha Atamu mo Eva kua fanau he mole e tuku ki tua he Atua e tau mamatua he katene ko Etena. Kakano he mena nei, to fuakau foki e tau fanau ti mamate.

Ane mai omaoma a Atamu mo Eva ki a Iehova, to liga moui fiafia a laua mo e tau fanau. Liga to maeke a lautolu oti ke momoui tukulagi mo e fiafia he lalolagi. To nakai fai tagata ka fuakau, gagao ti mate.

Manako e Atua ke he tau tagata ke moui tukulagi mo e fiafia, ti mavehe a Ia to pihia a lautolu he taha aho. Nakai ko e lalolagi katoa ni ka fulufuluola, ka to tino malolō foki e tau tagata oti kana. Ko e tau tagata oti he lalolagi to fekapitigaaki ai ti pihia foki mo e Atua.

Ka ko Eva kua nakai kapitiga a ia mo e Atua. Ti ko e magaaho ne fanau e ia e tau tama haana, ne nakai mukamuka ki a ia. Ne mamahi a ia. Ha kua liuliu ki a Iehova ne tupu mai ki a ia e momoko lahi, nakai kia talia e koe?

Ne loga e tau tama taane mo e tau tama fifine ha Atamu mo Eva. Magaaho ne fanau e tama taane uluaki ha laua, ne fakahigoa e laua a ia ko Kaino. Ne fakahigoa e laua e tama taane ke uaaki ko Apelu. Ko e heigoa ne tupu ki a laua? Iloa nakai e koe?