Ekitebyo 5

Amagara Mabi Gaatandika

BARI aheeru y’ekibanja kya Edeni, Adamu na Haawa bakareeba enaku nyingi. Bakaba baine kukora munonga okutunga eby’okurya. Omu mwanya gw’emiti emirungi erikwana ebijuma, bakareeba amahwa n’amatojo maingi gaakura gabeetoroora. Eki nikyo kyabaireho Adamu na Haawa obu baagomera Ruhanga kandi bakarekyera aho kuba banywani Be.

Kwonka ekibi munonga kukira ahari ekyo, Adamu na Haawa bakatandika kufa. Ijuka, Ruhanga akabehanangiriza ngu bakaba nibaija kufa baarya aha kijuma ky’omuti ogu yaabazibiire. Mpaho, omu izooba eri baakiriiriremu bakatandika kufa. Ka baakozire eky’obushema okutahurira Ruhanga!

Abaana ba Adamu na Haawa boona bakazaarwa bwanyima ya Ruhanga kubinga abazaire baabo omu kibanja kya Edeni. Eki nikimanyisa ngu abaana nabo bakaba nibaija kukaikura kandi bafe.

Adamu na Haawa kuri baayorobeire Yehova, obwo amagara gaabo n’ag’abaana baabo gakaba nigaija kubabeera marungi. Boona bakaba nibaija kuguma omu nsi bashemereirwe ebiro byona. Tihaine n’omwe owaabaire naija kukaikura, kurwara nari kufa.

Ruhanga naayenda abantu okugumaho ebiro byona bari omu kushemererwa, kandi Naaraganisa ngu obwire buryahika kibeho. Ti nsi yoona kuba nungi kwonka, kureka n’abantu boona baryagira amagara marungi. Kandi buri muntu aryaba ow’omukago ahari mutaahi we n’ahari Ruhanga.

Kwonka Haawa akaba atakiri munywani wa Ruhanga. N’ahabw’ekyo, okuzaara kwe kukamugumira. Akaba agira obusaasi. Okugomera Ruhanga buzima kukamureetera amaganya maingi, torikukiikiriza?

Adamu na Haawa bakaba baine abaana b’aboojo n’ababaishiki baingi. Omwana waabo w’okubanza omwojo ku yaazairwe, baamweta Kaini. Owaakabiri baamweta Abeeli. N’enki ekyababaireho? Nookimanya?

Okutandika 3:16-23; 4:1, 2; Okushuuruurwa 21:3, 4.