‘I TU‘A he ngoue ko ‘Ītení, na‘e a‘usia ai ‘e ‘Ātama mo ‘Ivi ha ngaahi faingata‘a lahi. Na‘e fiema‘u kiate kinaua ke na ngāue mālohi kae ma‘u ha‘ana me‘akai. ‘I he ‘ikai ko ha fua‘i‘akau faka‘ofo‘ofa, na‘á na sio ki he ‘akau talatala mo e talatala‘āmoa na‘e tupu takatakai ‘iate kinaua. Ko e me‘a eni na‘e hoko ‘i he taimi na‘e talangata‘a ai ‘a ‘Ātama mo ‘Ivi ki he ‘Otuá pea ‘ikai te na toe hoko ko Hono kaume‘á.

Ka ko e me‘a na‘e kovi ange aí, na‘e kamata leva ‘a ‘Ātama mo ‘Ivi ke na mate. Manatu‘i, na‘e fakatokanga ‘e he ‘Otuá kiate kinaua te na mate ‘o kapau te na kai mei he fu‘u ‘akau ‘e taha. ‘I he ‘aho pē ko ia na‘á na kai aí ne kamata leva ke na mate. Ko e vale ē ko ‘ena ta‘efiefakaongo ki he ‘Otuá!

Na‘e fanau‘i ‘a e fānau kotoa pē ‘a ‘Ātama mo ‘Iví hili hono tuku ‘e he ‘Otuá ‘a e ongo mātu‘á ni ki tu‘a mei he ngoue ko ‘Ītení. Na‘e ‘uhinga leva ia na‘e toe pau ke tupu ‘o motu‘a pea mate ‘a e fānaú.

Ka ne talangofua pē ‘a ‘Ātama mo ‘Ivi kia Sihova, na‘e mei fakafiefia pē ‘a e mo‘uí ia kiate kinaua mo ‘ena fānaú. Na‘a nau mei lava pē ‘o mo‘ui ta‘engata mo fiefia ‘i he māmaní. Na‘e ‘ikai mei ‘i ai ha taha ia ‘e tupu ‘o motu‘a, pea puke mo mate.

‘Oku fiema‘u ‘e he ‘Otuá ‘a e kakaí ke mo‘ui ta‘engata ‘i he fiefia, pea ‘okú Ne tala‘ofa ‘e ‘i ai ha ‘aho ‘e pehē ai. ‘E ‘ikai ngata pē ‘i he hoko ‘a e māmaní kotoa ‘o faka‘ofo‘ofá, ka ‘e toe mo‘ui lelei ‘a e kakai kotoa pē. Pea ‘e hoko ‘a e tokotaha kotoa pē ‘i he māmaní ko e kaume‘a lelei ia mo e tokotaha kotoa pē pea pehē mo e ‘Otuá.

Ka na‘e ‘ikai ke kei hoko ‘a ‘Ivi ko ha kaume‘a ‘o e ‘Otuá. Ko ia ‘i he‘ene fanau‘i ‘a ‘ene fānaú, na‘e ‘ikai ko ha me‘a faingofua kiate ia. Na‘á ne mamahi‘ia. Na‘e ‘omai kiate ia ‘e he‘ene talangata‘a kia Sihová ha ngaahi mamahi lahi, ‘ikai ko ia?

Na‘e ma‘u ‘e ‘Ātama mo ‘Ivi ‘a e ngaahi foha mo e ngaahi ‘ofefine tokolahi. ‘I hono fanau‘i hona ‘uluaki fohá, na‘á na fakahingoa ia ko Keini. Na‘á na fakahingoa hona foha fika uá ko ‘Ēpeli. Ko e hā ‘a e me‘a na‘e hoko kiate kinauá? ‘Okú ke ‘ilo‘i?