ЭДЕ́М САДТЫҢ кызыгаарындан дашкаар чурттаары Ада́м биле Е́вага дыка берге турган. Аъш-чем тывар дээш, олар аар-берге ажылдаар ужурга таварышкан. Чараш чаагай чимистерлиг ыяштарның орнунга оларны долгандыр тенниг хараганнар болгаш чашпаннар өзүп турган. Бурганга дыңнангыр эвес болганындан, база ооң-биле найыралды чидиргенинден шак мындыг чүүл үнген.

Ынчалза-даа эң-не багай чүүл — Ада́м биле Е́ва өлүр апарган. Сактып келем —олар бир ыяштың чимизин чиптер болза, өлүп каар деп, Бурган сагындырган болгай. Шак-ла ындыг болган — кажан олар чимисти чиптерге, ол-ла хүн олар өлүр апарган. Ада́м биле Е́ва Бурганны дыңнавайн баргаш, кайы-хире мелегей чорук кылган-дыр!

Ада́м биле Е́ваның шупту ажы-төлү, ада-иезин Эде́м садындан Бурган ойладыпкан соонда, төрүттүнген. Ынчангаш уруглары база кырааш, өлүр ужурга таваржыр турган.

Ада́м-биле Е́ва Иегованы дыңнаан болза, оларның болгаш уругларының чуртталгазы аас-кежиктиг турар ийик. Олар шупту чер кырынга аас-кежиктиг болгаш мөңге чурттаар турган. Ынчан кым-даа кырывас, аарывас база өлбес ийик.

Кижилер мөңге болгаш аас-кежиктиг чурттазын деп, Бурган күзеп турар, ынчангаш олар бир-ле кайгамчык хүнде мөңге чурттай бээр деп, ол аазап турар. Ынчан чер кайгамчыктыг чараш апаарындан аңгыда, кижилер база каң-кадык болур. Чер кырынга шупту кижилер эжишкилер болуп, база Бурганның өңнүктери апаар.

Е́ва Бурганның өңнүү болбайн барган. Ынчангаш ажы-төлдү божууру аңаа амыр эвес болган. Аңаа аарышкылыг болган. Иеговага дыңнангыр эвес чорук Е́вага кайы-хире хилинчекти чедирген-дир, көрүп тур сен бе?

Ада́м биле Е́ваның оолдары, уруглары хөй турган. Бир дугаар оглу төрүттүнүп кээрге, олар ону Ка́ин деп адап алган. Ийи дугаар оглун олар А́вель деп адаан. Олар-биле чүү болганыл, билир сен бе?