TE KʼALAL maba ayikix ta tsʼumbil kʼinal Edén te Adán sok te Evae, jajch staik bayal wokol yuʼun. Jajchik ta tulan aʼtel yuʼun stael te sweʼelike. Te banti ayik-ae maʼyukix lek te teʼetik te lekik ta loʼbeyel site, jaʼxanix chʼixetik sok jaʼmal chʼixetik te la yilik chʼiik tale. Jaʼ ini jich kʼot ta pasel te kʼalal te Adán sok te Eva la skʼaxuntaybeyik smantal te Dios sok te kʼalal la yijkʼitayik ta yamigoinel te Diose.

Jaʼukmeto ma jaʼuknax-abi. Te Adán sok te Eva ma kuxinikix ta sbajtʼel kʼinal. Julukme ta awoʼtan te albotik yuʼun Dios te ya xlajik yuʼun teme la sloʼbeyik sit te jpejt teʼ te ay ta awal tsʼunubile. Jich yuʼun ta kʼajkʼal-abi, kʼunkʼun jajchik ta meʼel mamalubel sok ta patil lajik bael. ¡Kʼax ma la snaʼik kʼinal te bitʼil ma la yichʼik ta mukʼ te bin albotik yuʼun te Diose!

Ta patil te kʼalal yichʼojikix tenel lokʼel yuʼun Dios ta tsʼumbil kʼinal Edén te Adán sok te Evae ayin yal snichʼnabik. Jaʼ ini ya yakʼ jnaʼtik te jaʼnix jich ya xmeʼel mamalubik sok ya xlajik bael euk te yal snichʼnabike.

Te lajuk schʼuumbeyik smantal Dios te Adán sok te Evae kʼax tseʼel yoʼtanik ta skuxlejalik sok te yal snichʼnabik te jichuke. Kuxinik ta sbajtʼel kʼinal sok stseʼelil yoʼtanik ta Balumilal te jichuke. Maʼyuk machʼa ya xmeʼel mamalub sok maʼyuk machʼa ya stsakot ta chamel sok maʼyuk machʼa ya xlaj bael te jichuke.

Te Dios ya skʼan te yakuk xkuxinik ta sbajtʼel kʼinal te ants winiketik sok stseʼelil yoʼtanik, sok yaloj ta jamal te ya sta yorail te jich ya spase. Ma jaʼuknax tʼujbil ya xkʼot ta swolol te Balumilale, melel spisil te ants winiketik ma stsakotikix ta chamel. Sok ya yamigoin sbaik ta jujuntul soknix ya yamigoinik euk te Diose.

Jaʼukmeto te Evae maba yamigoix-a te Diose. Jich yuʼun kʼax swokol te kʼalal ayin te jujuntul yale, melel akʼbot xkʼuxul. Ta swenta te bitʼil la skʼaxuntaybeyik smantal te Jehová la staik bayal wokol yuʼun, ¿mabal jichuk?

Te Adán sok te Eva la staik bayal yal snichʼnabik, keremetik sok achʼixetik. Te kʼalal ayin te ba alal yuʼunike la yakʼbeyik sbiilin Caín. Te schebale la yakʼbeyik sbiilin Abel. ¿Yabal anaʼ te bin kʼot ta swentaik te keremetik ini?