Nnḓa ha tsimu ya Edeni, Adamu na Eva vho vha na khakhathi nnzhi. Vho fanela u shumesa uri vha wane zwiḽiwa zwavho. Nṱhani ha miri yo nakaho ya mitshelo, vha vhona hu tshi mela mipfa minzhi na tsheṋe. Izwi ndi zwe zwa itea musi Adamu na Eva vha songo thetshelesa Mudzimu nahone vho litsha u vha khonani Dzawe.

Fhedzi zwo ṋaṋesaho, Adamu na Eva vha thoma u fa. Humbulani,Mudzimu o vha vhudza uri vho vha vha tshi ḓo fa arali vha ḽa mutshelo wa muṅwe muri. Ee, ḓuvha ḽeneḽo ḽe vha ḽa vha thoma u fa. Vho vha vhe matsilu hani u sa thetshelesa Mudzimu!

Vhana vha Adamu na Eva vho bebwa nga murahu Mudzimu o bvisa vhabebi vhavho tsimuni ya Edeni. Izwi zwi amba uri vhana na vhone vho vha vha tshi ḓo fanela u hula vha fa.

Arali Adamu na Eva vha vhe vho thetshelesa Yehova, vho vha vha tshi ḓo vha vho tshila zwavhuḓi na vhana vhavho nga hu sa fheli kha ḽifhasi. Ho vha hu tshi ḓo vha hu si na we a vha a tshi ḓo hula, a lwala a fa.

Mudzimu u ṱoḓa uri vhathu vha tshile nga hu sa fheli nga dakalo, nahone U fulufhedzisa uri ḽiṅwe ḓuvha vha ḓo ralo. Vhathu vhoṱhe vha ḓo vha na mutakalo. Nahone muṅwe na muṅwe kha ḽifhasi u ḓo vha khonani ya muṅwe na muṅwe na Mudzimu.

Fhedzi Eva o vha a si tsha vha khonani ya Mudzimu. Ngauralo musi a tshi beba vhana vhawe, a zwo ngo mu lelutshela. O vha na tshiṱhavhi. U sa thetshelesa Yehova ho mu ḓisela maṱungu manzhi, a ni zwi tendi?

Adamu na Eva vho vha na vharwa vhanzhi na vhananyana. Murwa wavho wa u thoma vha mu rina Kaini. Murwa wavho wa vhuvhili vha mu rina Abele. Ho itea mini khavho? Ni a zwi ḓivha?

Genesi 3:16-23; 4:1, 2; Ndzumbululo 21:3, 4.