Mwaha 5: Okumi Wooxankiha Onnipacerya
OTAA wa ejardim ya wEedeni, Adamu ni Eva yaahikhalana mixankiho sinceene. Awo yaahaana ovara muteko moohaawela wira aphwanye yoolya. Mmapuro mwa mirii sa mihokorokho sooreera, awo yoona miiwa sinceene ni ikhukwa simelaka mowaarukurerya. Ela ti yiiranen’ye vaavo Adamu ni Eva yahaamwiiwelenlya aya Muluku ni ahiya okhala mpatthani Aya.
Masi vootepa ovikana vo, Adamu ni Eva yaahipacerya okhwa. Munnuupuwela, Muluku aahaalopola awo wira yaamookhwa yalyaru muhokorokho a mwiri mukina. Saana, nihiku nennoxa yaalin’yaya yaahipacerya okhwa. Moota waarya aya alolo mwaha woohimwiiwelela Muluku!
Anamwane otheene a Adamu ni Eva yaayariwe Muluku owoomonle ene axitiithi aya ojardim wa Eedeni. Ela entaphulela wira anamwane nave-tho yaahaana wuuluvala ni okhwa.
Vaakhanle wira paahi Adamu ni Eva yaahimwiiwelela Yehova, okumi aya ni wa anaaya waarowa okhala woohakalaliha. Otheene aya yanwerya okhalaka oohakalala moohimala mu elapo ya vathi. Khuuvo aarowa wuuluvalaka, owereiwa ni okhwa.
Muluku oniphavela wira atthu akhaleke oohakalala moohimala, ni Owo onileiherya wira nihiku nikina sinimwiiraneya wa atthu awo. Khahiyo wira paahi elapo yotheene ya vathi tenrowa okhala yooreera, masi atthu otheene anrowa okhalana okumi wooreera. Nto ori otheene mu elapo ya vathi onrowa okhala mpatthani ooloka a Muluku ni wa ori otheene.
Masi Eva khiyaakhanle-tho mpatthani a Muluku. Siiso vaavo vaayaraaya anaaya, khivaakhala vookhweya wa awo. Yaanoona owereya. Ohimwiiwelela waya Yehova waahaaruuhela tthiri oriipiwa murima vanceene, nyuwo khimunaakhulela?
Adamu ni Eva yaahikhalana anamwane anceene axilopwana ni axithiyana. Vaavo mwanaya oopacerya mwaamulopwana vaayarinwa awe, yaahinvaha nsina noowi Kayini. Mwanaya a nenli mwaamulopwana yaahinvaha nsina noowi Abeli. Exeeni yaawiiranenle? Nyuwo munnisuwela?
Maphattuwelo 3:16-23; 4:1, 2; Wisupulula 21:3, 4.
Makoho
- Okumi wa Adamu ni Eva waari sai otaa wa ejardim ya wEedeni?
- Exeeni yaapacenrye owiiraneela Adamu ni Eva, ni nthowa xeeni?
- Nthowa xeeni anaaya Adamu ni Eva vaarowa aya wuuluvalaka ni okhwa?
- Vaakhanleke wira Adamu ni Eva yaahimwiiwelela Yehova, okumi aya ni wa anaaya waarowa okhala sai?
- Moota xeeni ohiiwelela wa Eva waakumihenrya aya owereya?
- Taavi yaari masina aanamwane aaxilopwana anli oopacerya a Adamu ni Eva?
- Tanii ale anamwane akina ari valataratoni?
Makoho oowuncererya
- Musome Maphattuwelo 3:16-23 ni 4:1, 2.
Okumi wa Adamu waavaren’ye sai mwaha wa olamphwa etthaya? (Maph 3:17-19; aRom 8:20, 22)
Nthowa xeeni nsina Eva, nintaphulela wi “Mukumi,” naary’aya nooreerela? (Maph 3:20)
Moota xeeni Yehova soonihenrya awe nttittimiho wa Adamu ni Eva hataa nuumala ottheka? (Maph 3:7, 21)
- Mmusome Wisupulula 21:3, 4.
“[Itthu xeeni sa] olumwenku wa khalai” siniphavela anyu wira simalamalihiwe?
