HA GAWAS han hardin han Eden, damu an nagin problema nira Adan ngan Eva. Kinahanglan magtrabaho hira hin maduruto basi makakaon. Imbes nga magrasa nga prutas an ira nakikita, tunukon nga mga tanom an aada ha palibot. Ini an nahitabo kanda Adan ngan Eva han waray hira sumugot ha Dios ngan han diri na hira sangkay Niya.

Kondi an maraot pa gud, hira Adan ngan Eva diri na mabubuhi ha kadayonan. Hinumdumi nga nagpahamangno an Dios nga mamamatay hira kon kumaon hira han bunga han usa nga kahoy. Oo, ha adlaw mismo nga kinaon hira, nagtikalagas hira ngan ha urhi namatay. Daku gud nga sayop nga waray hira mamati ha Dios!

Nagkaada mga anak hira Adan ngan Eva katapos hira pagawson han Dios ha hardin han Eden. Nangangahulogan ini nga an ira mga anak malalagas ngan mamamatay liwat.

Kon ginsunod nira Adan ngan Eva hi Jehova, malipayon unta hira ngan an ira mga anak. Malipayon unta hira nga magkikinabuhi ha kadayonan dinhi ha tuna. Waray unta malalagas, magkakasakit, ngan mamamatay.

Karuyag han Dios nga an mga tawo mabuhi nga malipayon ha kadayonan, ngan nagsaad Hiya nga maabot an panahon nga matutuman ito. Diri la magigin makaruruyag an bug-os nga tuna, kondi magigin mahimsog liwat an ngatanan nga tawo. Ngan magigin duok nga magsarangkay an ngatanan, ngan magigin sangkay hira han Dios.

Kondi hi Eva diri na sangkay han Dios. Salit nakurian hiya ha pagpanganak. Nauyon ka ba nga tungod kay waray hiya sumugot kan Jehova, nag-antos hiya hin damu nga kasakitan?

Damu an anak nga lalaki ngan babaye nira Adan ngan Eva. An ira suhag ginngaranan hin Kain. Ngan gintawag nira nga Abel an ira ikaduha nga anak. Maaram ka ba kon ano an nahitabo kanda Kain ngan Abel?