Tantara 5

Nanomboko Jaly

ADAMA ndreky Eva nijaly, koa fa niala tamy zaridain̈’Edena tao. Irô tsy maintsy niasa mare, beky mahita hanin̈y. Fatsiky ndreky ahitry fo hitan-drô naniry, fa tsy voankazo tsara aby in̈y eky. Zen̈y raha nahazo Adama ndreky Eva, koa fa tsy nan̈araka volan̈a Zan̈ahary. Irô tsy kamaradiny eky.

Mbala ratsiratsin’izen̈y, Adama ndreky Eva hofoaty. Alaiva onon̈o, Zan̈ahary nivolan̈a tamin-drô fa, izikoa irô mihina voankazo araiky in̈y, maty. Ke rango tamin’andra nihinanan-drô voankazo in̈y, fahafatesan̈a niambin̈y irô. Ratsy tsy man̈araka volan̈a Zan̈ahary, tsy zen̈y?

Efa tafaran’ny nandroasan’ny Zan̈ahary irô, Adama ndreky Eva vo niteraka. Dikan’izen̈y, zanakan-drô koa tsy maintsy mahaimatoe, aviô maty.

Izikoa Adama ndreky Eva nan̈araka volan̈a Zan̈ahary, ôtrizay irô ndreky zanakan-drô sambatra. Irô jiaby nety ho velon̈o tambony tany teto tsisy farany. Tsy ho nisy olo matoe, marary, aviô maty.

Tian’ny Zan̈ahary olo sambatra, sady izy nivolan̈a koa fa, andra araiky an̈y olo mbala ho sambatra. Tany ho tsara, baka iô olo hipetraka ao ho salama vatan̈a tsy marary. Olo jiaby amy zen̈y kamarady, sady ho kamaradin’ny Zan̈ahary.

Eva tsy kamaradin’ny Zan̈ahary eky. Zen̈y nahavy izy sahiran̈a koa fa niteraka. Narary mare izy. Tsy fan̈arahan̈a volan̈a Jehovah fo nampijaly izy karaha zen̈y, tsy zen̈y?

Adama ndreky Eva niteraka lelahy ndreky man̈angy maro. Koa fa teraka zanakan-drô lelahy voanalohany, nataon-drô Kaina an̈arany. Araiky fan̈arakaraka, nataon-drô Abela. Mba hainao, karakôry fiain̈anan-drô?

Genesisy 3:16-23; 4:1, 2; Apokalypsy 21:3, 4.