TALA kuli Kene ni kuli Abele haliapwila. Ayo hi ja kola. Kene yapwa njimi. Te kakulima mbuto, mihuko ni yilimalima ya kulia.

Abele yapwa kafunga wa mapanga. Iye te kakuzanga kufunga mapanga. Mapanga yakola yapwa anene-anene, hi, ha mashimbu akehe, Abele yapwa ni mapanga anji akufunga.

Limwe tangwa Kene ni Abele yaneha milambu yo kuli Zambi. Kene yaneha yimwe mihuko yize yinakakola mu wande wenyi. Abele neye yaneha umwe panga mupema yoze apwile nenyi. Yehova yazanga Abele ni mulambu wenyi. Alioze kakazangile Kene ni we mulambu wenyi. Yena unanyingika mumu liaka?

Hi wika ko ngwo mulambu wa Abele te upema kuhianyisa wa Kene, ka. Alioze mumu te Abele mutu mupema. Iye te kakuzanga Yehova ni mwe yayo. Mba alioze Kene te mutu mupi; iye te keshi kuzanga mwana-kwo.

Kashika Zambi yamba kuli Kene ngwo te chamutamba kwalumuna yitanga yenyi. Alioze Kene kapalileko. Iye yapwa ni uli unji mumu Zambi yazanga chinji Abele. Mba Kene yamba kuli Abele ngwenyi, ‘Twiye ku wande.’ Kuze kwene muze apwile ukawo, Kene yalamba mwana-kwo Abele. Yamulamba chikolo hohene iye yafwa. Chuma chino Kene anakalinga hi chipi ko?

Chipwe ngwe Abele hanafu, alioze Zambi kakumunyonga. Abele kapwile mutu mupema, kashika Yehova keshi kuvulama atu apema ngwe Abele. Kashika limwe tangwa Yehova Zambi makafunyisa Abele ku mwono. Ha mashimbu jacho Abele kechi keza kafwa nawa. Iye makatwama ni mwono wa miaka yeswe hano hashi. Hi chipema ko kunyingika atu ngwe Abele?

Alioze Zambi keshi kuzanga atu waze apwa ngwe Kene. Muze Kene ashahile mwana-kwo, Zambi yamusopesa ni kumuhuma kusuku ni asoko jenyi. Muze Kene ayile ku sali likwo lia hashi, yaya ni umwe ndumbwenyi wa pwo, yoze anakalimbata nenyi.

Kulutwe lia matangwa Kene ni mukwo-pwo yapwa ni ana. Ni ana akwo a Alama ni Eva yalimbata, nawa yasema ana. Ha mashimbu akehe atu yoka hano hashi. Mutulilongesa ha kutwala kuli atu jacho.