PIIRAKAA nümüin Caín otta Abel. Miyoʼuyuuinapa naya, apünajüi Caín.

Arüleejüi anneerü Abel, anasü maʼin nümüin aaʼinmajaa na anneetchenniikana. Naainnua miyoʼuyuushii otta wainmashii mapa.

Soʼu wanee kaʼi asülajüshi Caín süchon nüpünajüin nümüin Maleiwa otta Abel asülajüshi saʼanasia naʼanneetse. Talatüshi Jeʼwaa nümaa Abel otta sümaa tü nüsülajalakat, akaisaʼa nümaa Caín otta tü nüsülajalakat nnojoishi talatüin. ¿Jamüshi nnojoika talatüin nia?

Nnojotsü shiain süka anain maʼin tü nüsülajalakat Abel nuulia Caín. Shia süka anamiain Abel, aishi nüpüla Jeʼwaa otta chi nuwalakai. Akaisaʼa Caín mojulaashi, nnojoishi alin chi nuwalakai nüpüla.

Makalaka nuluwataain Jeʼwaa Caín sünain aʼwanajawaa nukuwaʼipa. Akaisaʼa niakai nnojoishi jaa müin, jashichishi neʼe süka niyouktüin nia Jeʼwaa. Müshi Caín nümüin Abel: ‹Jooʼuya chaaʼaya wünaʼapümüin›. Namüiwaʼapa naya, nuʼutaka naaʼin chi nuwalakai. ¿Mojusü saaʼin pümüin tü naainjakat Caín?

Sotushi naaʼin Maleiwa Abel süka anamiain nia, müshiʼiya na wayuu anamiakana nnojoishii motuin naaʼin Jeʼwaa. Makalaka katüinjatüin noʼu nüchikuaʼa nutuma süpüla kepiainjachin nia waneepia saaʼu tü Mmakat. ¡Aneerü maʼin eʼraajaa wayuu eeka müin aka naaʼin!

Niyouktüin Maleiwa wayuu eeka müin aka naaʼin Caín. Sutuma tia nüjünajaanaka wattamüin suulia nüpüshi. Nümaaka wanee nuwala süpüla nuʼwayuusein shia.

Mapa kachonshi Caín otta na wanee nüchonniikana Adán. Sutuma tia wainmaka wayuu saaʼu tü Mmakat. Weʼraaja napüshi.