EHUNGI 6

Omuzandu omuwa, nomuvi

NAMBANO tara ku Kain na Abel. Aveyevari ve kura. Kain wa rira omuṱuta. Eye wa kuna ovikokotwa novihape novikunwa.

Abel wa rira omurise wozonḓu neye wa suverere okutjevera ouyona. Ouyona mbwi we kura au rire ozonḓu ozonene, nu tjimanga Abel wa ri norupanda orunene rwozonḓu okutjevera.

Eyuva rimwe Kain na Abel va tjita ombunguhiro ku Mukuru. Kain wa eta ovikurya eye mbya kuna. Nu Abel a eta onḓu indji osembasemba ndja ri nayo. Jehova wa ri nonyuṋe na Abel nombunguhiro ye. Nungwari ka ri nonyuṋe na Kain nombunguhiro ye. Ove mo tjiwa kutja omena ratjike?

Omena rokutja ombunguhiro yaAbel ya ri osemba pu indji oyaKain nu Abel wina wa ri omurumendu omuwa. Eye wa suverere Jehova nerumbi re. Nungwari Kain wa ri omuvi. Eye kena pa suverere omwangu we.

Okutja Mukuru wa raera Kain okutanaura ongaro ye. Nungwari Kain kena pa puratena. Eye wa pindika mena rokutja Mukuru wa suverere Abel kombanda ye. Okuzambo Kain wa raera Abel: ‘Indjo tu yende mokuti.’ Ngunda ave ri ngo aveyerike, Kain a tono omwangu we Abel. Eye we mu tona nomasa ngandu tje mu zepa. Katja ri otjiṋa otjitirise Kain tja tji ta hi?

Nandarire kutja Abel wa ṱa, Mukuru me mu zemburuka. Abel wa ri omundu omuwa, nu Jehova ka zembi omundu tjimuna ngo. Mena ranao eyuva rimwe Jehova Mukuru me mu pendura komuinyo. Moruveze ndo Abel kena kuhepa okukoka rukwao. Eye ma yenene okuhupa kombanda yehi ngaaruhe. Katji nokurira otjiṋa otjiwa okutjiwa ovandu otja Abel?

Mukuru kena onyuṋe novandu tjimuna Kain. Mena ranao Kain tja za nokuzepa omuangu we, Mukuru we mu vera mokumuhinda kokure neṱunḓu re arihe. Kain tja ka tura morupa rwarwe rwehi wa twaerera omuṱena kwe umwe, nu eye wa rira omukazendu we.

Oruveze tjaaru kayenda Kain nomukazendu we va uta okupanduka ovanatje. Ovazandu novakazona varwe va Adam na Eva va kupwa, nu owo wina va panduka ovanatje. Tjimanga ovandu va takavara kombanda yehi. Indjeye tu rihonge ohunga na tjiva vawo.

Genesis 4:2-26; 1 Johanes 3:11, 12; Johanes 11:25.

Omapuriro womakonḓononeno