ЕПЛЪЫТ иджы Къэбылрэ Хьэбылрэ. Ахэр балигъ хъуащ. Къэбыл щІым толэжьыхьыр. Абы къегъэкІ жылапхъэхэр, пхъэщхьэмыщхьэхэр, хадэхэкІхэр.

Хьэбыл мэл егъэхъу. Абы игу ирохь мэл цІыкІухэм кІэлъыплъын. Ахэр ин мэхъури куэд дэмыкІыу и хъушэр мэбагъуэ.

Зэгуэрым Къэбылрэ Хьэбылрэ Алыхьым тыхь къыхуахьат. Къэбыл езым къигъэкІахэм щыщ къихьащ. Хьэбыл езым и мэл нэхъыфІ дыдэхэм щыщ къихьащ. Иеговэ игу ирохь Хьэбылрэ абы къыхуихьамрэ. Ауэ абы игу ирихькъым Къэбылрэ абы и тыгъэмрэ. ПщІэрэ сыт щхьэкІэми?

Хьэбыл и тыгъэр Къэбыл къихьам нэхърэ нэхъыфІуракъым, атІэ Хьэбыл цІыхуфІщи аращ. Абы фІыуэ елъагъу Иеговэрэ и къуэшымрэ. Ауэ Къэбыл цІыху Іейщ икІи и къуэшыр фІыуэ илъагъукъым.

Абы щхьэкІэ Алыхьыр Къэбыл йолъэІу зихъуэжыну. Ауэ ар абы едаІуэкъым. Алыхьым Хьэбыл нэхъыфІу зэрилъагъум Къэбыл Іейуэ къегъэгубжь. Зэгуэрым абы Хьэбыл жреІэ: «НакІуэ губгъуэм дыгъакІуэ»,— жеІэри. ТІури зэгъусэу губгъуэм къина иужькІэ, Къэбыл и къуэшым йоуэ. АпхуэдизкІэ еуати, Хьэбыл малІэ. Телъыджэтэкъэ-тІэ а Къэбыл ищІар?

Хьэбыл лІами, Алыхьым ар щыгъупщакъым. Ар цІыхуфІт — Иеговэ зэикІ апхуэдэ цІыхухэр щыгъупщэкъым. Зы махуэ гуэр Алыхь Иеговэ Хьэбыл къигъэхъужынущ. Мис итІанэ ар афІэкІа лІэжынукъым. Ар игъащІэкІэ мы щІылъэм щыпсэунущ. ФІыгъуэшхуэкъэ-тІэ Хьэбыл хуэдэ цІыхухэр зэбгъэцІыхуну?

Алыхьым игу ирихькъым Къэбыл хуэдэ цІыхухэр. И къуэшыр зэриукІам щхьэкІэ, Алыхьым Къэбыл тезыру трилъхьащ и унагъуэм пэІэщІэу псэуну. НэгъуэщІ щІыпІэ щыІэпхъуэм щыгъуэ, Къэбыл и шыпхъухэм щыщ зы щхьэгъусэу къыздищтащ.

Зэман дэкІа иужь, Къэбылрэ и щхьэгъусэмрэ бын ягъуэтащ. Іэдэмрэ Хьэуарэ адрей я къуэхэми фыз къашащ, я пхъухэр дэкІуащ, абыхэми сабий ягъуэтащ. Куэд дэмыкІыу дунейм цІыху куэд къытехъуащ. ИІэт зэдгъэцІыхунти абыхэм ящыщ гуэрхэр.