KʼE REETAL laj Cain ut laj Abel ak winqebʼ chik. Laj Cain aj awinel.

Laj Abel aj ilol karneer ut nawulak chiru ebʼ li kokʼ xul aʼin. Ebʼ li xkarneer laj Abel keʼtamk.

Saʼ jun kutan laj Cain ut laj Abel keʼxkʼe re li Yos jun li maatan. Laj Cain kixkʼam ruhebʼ li rawimq ut laj Abel kixkʼam xchaabʼilal ru ebʼ li xkarneer. Li Jehobʼa kixkʼul li xmaatan laj Abel. Abʼan, inkʼaʼ kixkʼul li xmaatan laj Cain. Ma nakaanaw kʼaʼut?

Laj Abel chaabʼil xnaʼlebʼ. Naxra li Yos ut naxra ajwiʼ li ras. Li xmaatan laj Abel jwal chaabʼil chiru li xmaatan laj Cain. Abʼan laj Cain maaʼus xnaʼlebʼ ut xikʼ naril laj Abel, li riitzʼin.

Li Yos kixye re laj Cain naq tento tixjal xnaʼlebʼ. Abʼan laj Cain inkʼaʼ kixjal xnaʼlebʼ. Laj Cain yook xjosqʼil xbʼaan naq li Yos sa naril laj Abel. Saʼ jun kutan, laj Cain kixbʼoq laj Abel chirix ut naq wankebʼ xjunes kixsakʼ ut kixkamsi. Yiibʼru kixbʼaanu laj Cain, peʼyaal?

Usta kamenaq chik laj Abel toj wank saʼ xchʼool li Yos. Laj Abel chaabʼil chaq xnaʼlebʼ. Ut li Jehobʼa inkʼaʼ naxsachebʼ saʼ xchʼool li chanchanebʼ laj Abel. Joʼkan naq twulaq xqʼehil naq li Jehobʼa tixwaklesi wiʼ chik chi yoʼyo laj Abel. Chirix chik aʼan laj Abel maajunwa chik tkamq. Twanq xyuʼam chi junelik arin saʼ Ruuchichʼochʼ. Us raj xnawbʼalebʼ ru li chaabʼilebʼ xnaʼlebʼ joʼ laj Abel!

Li Yos inkʼaʼ nawulak chiru li chanchanebʼ laj Cain. Naq laj Cain kixkamsi li riitzʼin najt kitaqlaak xbʼaan li Yos. Naq xko laj Cain, kixkʼam chirix jun li ranabʼ ut aʼan kikanaak choʼq rixaqil.

Chirix chik aʼan laj Cain ut li rixaqil keʼwank xkokʼal. Joʼkan ajwiʼ ebʼ li ralal xkʼajol laj Adan ut xʼEva keʼsumla ut keʼwank xkokʼal. Chi joʼkan keʼtamk li poyanam saʼ Ruuchichʼochʼ. Qanawaq ruhebʼ wiibʼ oxibʼaq li poyanam aʼin.