PANO akimona Kaina ne Abela. Bonse babiji bakoma. Kaina waikele ke njimi. Wajiminenga kajo ka museke, bipangwa ne bishu.

Abela walelele mikooko. Watemenwe bingi kulama twana twa mikooko. Atuno twana twa mikooko twakomene ne kwikala mikooko ikatampe, kabiji Abela waikele na jitanga jikatampe ja mikooko yo afunganga.

Juba jimo Kaina ne Abela baletele bya bupe kwi Lesa. Kaina waletele kajo ko ajimine. Abela waletele mukooko wawamisha ye ajinga nanji. Yehoba wamutajile bulongo aye Abela ne bupe bwanji. Pakuba Kaina ne bupe bwanji kechi wibitajile bulongo ne. Nanchi wayuka kyalengejile nyi?

Kechi na mambo a kubatu’mba bupe bwa kwa Abela bwawamine kukila bwa kwa Kaina ne. Ke na mambo a kuba’mba Abela wajinga muntu wawama. Watemenwe Yehoba ne kolojanji pamo. Bino Kaina wajinga watama, mambo kechi watemenwe nkasanji ne.

Onkao mambo Lesa waambijile Kaina amba apimpule byubilo byanji. Bino Kaina kechi waumvwijile ne. Wazhingijile bingi mambo Lesa watemenweko Abela. Kepo Kaina aambijile Abela amba, ‘Twaya, tuye mungye.’ Kabiji byo bajinga mungye bubiji bwabo, Kaina wamupumine nkasanji Abela. Wamukampile kyabaya bingi ne kumwipaya. Nanchi kino kechi kyajinga kintu kyatama kyaubile Kaina nenyi?

Nangwa kya kuba Abela wafwile, Lesa ukimuvuluka. Abela wajinga muntu wawama, kabiji Yehoba kechi ulubamo bantu baji byonka byajinga Abela ne. Onkao mambo, juba jimo Yehoba Lesa ukamusangula Abela. Pa kyokya kimye, Abela kechi ukafwa jibiji ne. Ukekalanga myaka ne myaka panopantanda. Nanchi kechi kikawama kuyuka bantu nabiji Abela nenyi?

Bino Lesa kechi watemwa bantu baji byonka byajinga Kaina ne. Onkao mambo panyuma ya kuba Kaina waipaya nkasanji, Lesa wamukambwile kupichila mu kumutwala kwalepa na kisemi kyanji. Kaina byo ayile na kwikala ku mpunzha ingi, wasendelepo nyenga yanji umo, ne kumwalula ke mukazhanji.

Mu kuya kwa moba Kaina ne mukazhanji batendekele kusema baana. Baana bakwabo babalume ne babakazhi ba kwa Adama ne Evwa nabo basongwelenga ne kusongolwa, ne kusema baana. Kino kyalengejile kuba’mba panopantanda pekale bantu bavula bingi. Twaya tufundepo bamo ba mwiabo.