TALA pano ba Kena ne Abele. Abo bonso babidi pano abatama. Kena ke kidimye. Udima miseke ne bipa ne munamuna.

Abele ke mukumbi wa mikōko. Usenswe kulama mikōko myana. Kupwa mikōko’ya yatama ke mikatampe, pano ne pano, Abele kadi na luombe luvule lwa kukumba.

Difuku dimo, ba Kena ne Abele bakalambula byabuntu kudi Leza. Kena waleta bidibwa bimobimo byakunine. Abele nandi waleta mikōko miyampe yadi nayo. Yehova wasangela Abele ne kyabuntu kyandi. Ino kasangedilepo Kena ne kyabuntu kyandi. Uyukile i mwanda waka?

Ke enkapo mwanda kyabuntu kya Abele i kiyampe kupita kya Kena, mhm. I mwanda Abele i muntu muyampe. Uswele Yehova ne mwanabo mwine. Ino Kena i umbi; kaswelepo mwanabo.

Ebiya Leza wasapwila Kena’mba, ufwaninwe kwalamuka. Ino Kena kemvwenepo. Wakalabala mwanda Leza wasanswa Abele kutabuka. Penepo Kena wasapwila mwanabo Abele’mba: ‘Twaya ku madimi.’ Kwine’kwa, kwa bunka bwabo, Kena wakupila mwanabo Abele. Wamukupila bininge wamwipaya. Mwene mwanda ulongele Kena i umbi?

Nansha shi Abele ke mufwe kala, Leza umuvulukanga nyeke. Abele wādi muntu muyampe, ne Yehova kelwangapo muntu wa uno muswelo. Difuku dimo, Yehova Leza ukasangulanga Abele. Mu kine kitatyi’kyo, Abele kakafupo dikwabo. Ukekala na būmi bwa nyeke pano pa ntanda. Mwene kikekala kiyampe kuyuka bantu badi pamo bwa Abele?

Ino Leza kasangelangapo bantu badi bwa Kena. O mwanda Kena pa kupwa kwipaya mwanabo, Leza wāmupele mfuto, na kumupangila kulampe na ba mu kyandi kisaka. Pāendele Kena kukekala kulampe ku kipindi kikwabo kya ntanda, wāselele umo wa mu banababo bana-bakaji, wāikala ke wandi mukaji.

Kena ne wandi mukaji bāshilwile kubutula. Bana bakwabo bana-balume ne bana-bakaji bābutwile ba Adama ne Eva nabo bēsongele, bābutula bana. Ponka’po, ntanda yāikala na bantu bavule. Tubandaulei bamobamo umbukata mwabo.