TLAPOUALISTLI 6

Se tekone yolkuali uan se amo yolkuali

AXKAN xikinmita Caín uan Abel. Axkan yejuan ome yomoskaltijkej. Caín tlatoka. Kitoka tlatlamantli xinachtli, tlakilolmej uan kilmej.

Abel kinmiskaltia ichkamej. Kipaktia kinmaluis ichkatsitsintin. Ninmej moskaltiaj uan mochiuaj uejueyij, Abel kipia miakej ichkamej tlen kinmaluis.

Se tonal, Caín uan Abel okiuikilijkej toTajtsin Dios se tetliokolil. Caín okitemakak tlakuali tlen ye okitokak. Uan Abel okitemakak se ichka tlen okachi kuali. Jehová okiyolpakti Abel uan itetliokolil. Maski ijkon, amo okiyolpakti Caín uan itetliokolil. ¿Tikmati tleka?

Nin amo kijtosnekia itetliokolil Abel okatka okachi kuali uan amo tlen iaxka Caín. Jehová okipakti itetliokolil Abel pampa ye okatka yolkuali. Okitlasojtlaya Jehová uan noijki ikni. Caín amo okatka yolkuali; amo okitlasojtlaya ikni.

Ik non, toTajtsin Dios okilui ma kipatla iyelis. Maski ijkon, Caín amo okikakili. Okualanki miak pampa toTajtsin Dios okachi omoyolpakti itech Abel. Caín okilui Abel: ‘Tiauij tlalan’. Ompa, ijkuak san inseltij okatkaj, Caín okiuitekik ikni. Ken sapanoa chikauak okiuitekik, okimikti. Tlen okichi Caín sapanoa amo kuali, ¿amo melauak?

Maski Abel omikik, Jehová ok kilnamiki. Abel okatka yolkuali, uan Jehová amo keman kinmilkaua akinmej yolkualmej. Ik non, se tonal Jehová kiyolitis Abel. Ijkuakon, Abel amo keman mikis. Uelis yoltos nochipa nikan itech Tlaltikpak. ¿Mitspaktiskia tikinmixmatis oksekimej tlen yolkualmej ken Abel?

ToTajtsin Dios amo kipaktia tlaltikpaktlakamej tlen kichiuaj ken Caín. Ik non, satepan Caín okimikti ikni, toTajtsin Dios okititlanki uejka kanin amo kinmitaskia ichanejkauan. Ijkuak Caín oksekan ochantito, okiuikak se iuelti uan omochi isiua.

Satepan, Caín uan isiua okinpixkej inkoneuan. Uan oksekimej inkoneuan Adán uan Eva noijki omonamiktijkej uan okinpixkej inkoneuan. Uan ijkon omomiaktilijkej tlaltikpaktlakamej itech Tlaltikpak. Ma tikinmixmatikan sekimej.

Génesis 4:2-26; 1 Juan 3:11, 12; Juan 11:25.