Historia 6

Se kuajli tekoneuj, niman se xkuajli

XKIMITA aman Caín iuan Abel. Yonoskaltijkej. Caín yonochiuj tokaketl. Yejua kitoka tlemach xinachtli, tlakilyomej niman kijli.

Abel kimiskaltia borreguitos. Yejua kuelita kintlajpiyas. Borreguitos noskaltiaj niman melak uejueyiyaj, nimantsin okinpix miyekej tlen kintlajpiaya.

Se tonajli Caín iuan Abel okitkilijkej toTajtsin se tetlayokolijli. Caín okitkik itlaj tlen yejua okitokak. Niman Abel okuikak se borreguito tlen melak chikauak. Jehová okiyolpakti Abel niman itetlayokolil. San ika, xokiseli Caín iuan itetlayokolil. ¿Tikmatstika tleka?

Xpampa okuelitak itetlayokolil Abel niman xokuelitak tlen Caín okimakak. Abel yolkuajli, kitlasojtla Jehová niman ikniuj. Caín yejua xkuajli iyojlo; xkitlasojtla ikniuj.

Ika yejon, toTajtsin okijli Caín ika noneki manoyolpatla. San ika, Caín xokikakisnek. Yejua melak kualani pampa toTajtsin okitlapejpeni Abel. Caín kijlia Abel: ‘Tiauej ipan tepetl’. Ompa, ijkuak inselti nemij, Caín okimikti ikniuj. ¿Xtiknemilia ika xkuajli tlen okichiuj?

Maski Abel omik, Jehová xkilkaua. Abel kuajli katka, niman toTajtsin xkeman kimilkaua tlaltikpakchanejkej akin ijkon kichiuaj. Ika yejon, toTajtsin kichiuas oksejpa mayoliui Abel. Ipan yejon tonajli Abel xok keman mikis. Uelis nemis nochipa nikan ipan tlaltikpaktli. ¿Xmelak ika kuajli yes tla, tikimixmatiskej tlaltikpakchanejkej ken Abel?

San ika, toTajtsin xkiyolpaktia akin kichiuaj ken Caín. Sakin, ijkuak Caín yokimikti ikniuj, toTajtsin okititlan uejka itech ichanejkauan. Ijkuak Caín oyaj ochantito oksekan ipan tlaltikpaktli, okuikak se ikniuj siuatl, niman yejua onochiuj isiuauj.

Sakin Caín iuan isiuauj okinpixkej ikoneuan. Oksekimej ikoneuan Adán iuan Eva ononamiktijkej niman noijki okinpixkej inkoneuan. Nimantsin onomiyekilijkej ipan tlaltikpaktli. Matikimixmatikan san sekimej.

Génesis 4:​2-​26; 1 Juan 3:​11, 12; Juan 11:​25.