ONOONO ki a Kaino mo Apelu mogonei. Kua lalahi tokoua a laua. Ko Kaino kua eke mo tagata gahua fonua. Ne to e ia e tau saito mo e tau fua lakau mo e tau laukou kai.

Ne eke a Apelu mo tagata leveki mamoe. Fiafia lahi a ia ke leveki e tau punua mamoe. Ne tutupu hake ai mo tau mamoe lalahi, ti nakai leva kua lahi e fuifui mamoe ha Apelu ke matakaki ki ai.

Taha aho ne tamai e Kaino mo Apelu e mena fakaalofa ke he Atua. Ne tamai e Kaino e tau kai haana ne to. Tamai e Apelu e mamoe haana ne mua atu e mitaki. Kua fiafia lahi a Iehova ke he mena fakaalofa ha Apelu. Ka e nakai fiafia a Ia ke he mena fakaalofa ha Kaino. Iloa nakai e koe ko e ha?

Nakai ni ha kua mitaki e mena fakaalofa ha Apelu mai he ha Kaino. Ka ko e kakano ko Apelu ko e tagata mitaki. Kua fakaalofa a ia ki a Iehova mo e haana taokete. Ka e kelea a Kaino; ha kua nakai fakaalofa a ia ke he haana tehina.

Ti tala age e Atua ki a Kaino kua lata a ia ke hiki haana tau puhala. Ka e nakai fanogonogo a Kaino. Kua ita lahi a ia ha kua mua atu e fiafia he Atua ki a Apelu. Ti pehē a Kaino ki a Apelu, ‘Hau a taua ke ō ke he fonua.’ I ai, ha ko laua ni tokoua, ne keli e Kaino haana tehina ko Apelu. Ne keli lahi e ia a Apelu ti mate ai. Nakai kia ko e mena kelea lahi a ia ne taute e Kaino?

Pete ni kua mate a Apelu, ne manatu agaia he Atua a ia. Ko e tagata mitaki a Apelu, ti nakai nimo e Iehova e tagata pihia. Taha aho to liu a Iehova ke fakamoui a Apelu. He magaaho ia to nakai liu a Apelu ke mate. To maeke a ia ke nofo mo e moui tukulagi he lalolagi nei. Nakai kia ko e mena mitaki ke iloa e tau tagata tuga a Apelu?

Ka e nakai fiafia e Atua ke he tau tagata tuga a Kaino. He magaaho ne kelipopo e Kaino haana tehina, ne fakahala he Atua a ia he fakafano mamao atu mai he haana magafaoa. He fano a Kaino ke nofo he taha vala kehe he lalolagi, ne uta e ia taha he haana tau mahakitaga, ti eke a ia mo hoana haana.

Fai magaaho, ti kamata a Kaino mo e haana hoana ke fai fanau. Ko e falu tama taane mo e tau tama fifine ha Atamu ne mau ai, ti fanafanau foki a lautolu. Nakai leva ti tokologa lahi e tau tagata he lalolagi. O mai la ke fakaako ke he falu ia lautolu.