Ekitebyo 6

Omwana Omurungi Hamwe n’Omubi

REEBA Kaini na Abeeli hati. Bombi baakuzire. Kaini n’omuhingi. Naahinga engano n’ebijuma n’emboga.

Abeeli n’omuriisa w’entaama. Naakunda kuriisa abaana b’entaama. Nibakura barugamu entaama enkuru, n’ahabw’ekyo omu bwire bukye Abeeli aine obusyo buhango bw’okuriisa.

Eizooba rimwe Kaini na Abeeli bakareetera Ruhanga emitoijo. Kaini yaareeta aha bi yaahingire. Kandi we Abeeli yaareeta entaama erikukirayo oburungi ei yaabaire aine. Yehova yaasiima Abeeli n’omutoijo gwe. Kwonka tiyashemerererwa Kaini n’ebi yaatoija. Noomanya ahabwaki?

Ti habw’okugira ngu omutoijo gwa Abeeli nigukira ogwa Kaini. N’ahabw’okuba Abeeli n’omushaija murungi. Naakunda Yehova hamwe na mukuru we. Kwonka Kaini ni mubi; tarikukunda omurumuna.

N’ahabw’ekyo, Ruhanga agambira Kaini kuhindura aha mitwarize ye. Kwonka Kaini tahurira. Aine ekiniga kingi ahakuba Ruhanga naakunda Abeeli kumukira. Atyo Kaini agambira Abeeli ati: ‘Ija tuze omu ishwa.’ Ku baba bari okwo bonka, Kaini ateera Abeeli. Amuteera munonga amwita. Ekyo t’ekintu kibi munonga eki Kaini yaakozire?

N’obu Abeeli araabe yaafiire, Ruhanga naakimwijuka. Abeeli akaba ari murungi, kandi Yehova tarikwebwa omuntu nk’ogwo. N’ahabw’ekyo eizooba rimwe Ruhanga aryamuzoora. Omu bwire obwo, Abeeli aryaba atarigaruka kufa. Naija kutuura aha omu nsi ebiro byona. Tikiraije kuba kirungi okumanya abantu nka Abeeli?

Kwonka Ruhanga tarikushe- merererwa abantu abari nka Kaini. N’ahabw’ekyo bwanyima ya Kaini kwita omurumuna, Ruhanga akamufubira arikumubinga kuruga omuka omu baabo. Obu Kaini yaaza omu kicweka ky’ensi ekindi, akagyenda n’omwe ahari banyaanya, kandi yaaba omukazi we.

Ebiro ku byagyenzire nibihingura, Kaini n’omukazi we baatandika kuzaara abaana. Abandi batabani na bahara ba Adamu na Haawa bakashwerana, kandi nabo baazaara abaana. Omu bwire bukye hakabaho abantu baingi omu nsi. Ka twegye ebirikukwata ahari bamwe ahari bo.

Okutandika 4:2-26; 1 Yohaana 3:11, 12; Yohaana 11:25.