WAK Kain i Abel ei. Nan dos ta hende grandi. Kain a bira kunukero. E ta planta grano i fruta i bèrdura.

Abel a bira wardadó di karné. E gusta kuida lamchi. Nan ta krese bira karné grandi, i p’esei pronto Abel tin un tou grandi di karné pa kuida.

Un dia Kain i Abel a hiba un ofrenda pa Dios. Kain a ofresé kuminda ku el a produsí. Anto Abel a ofresé e mihó karné ku e tabatin. Yehova a keda kontentu ku Abel i su ofrenda. Pero e no a keda kontentu ku Kain ni su ofrenda. Bo sa pakiko?

Esei no ta simplemente pa motibu ku e ofrenda di Abel ta mihó ku esun di Kain, sino pa motibu ku Abel ta bon hende. E ta stima Yehova i su ruman. Pero Kain ta mal hende; e no ta stima su ruman.

P’esei Dios a bisa Kain ku e mester kambia su manera. Pero Kain no a skucha. El a bira masha rabiá pasobra Dios a gusta Abel mas. P’esei Kain a bisa Abel, ‘Ban na e kunuku aya.’ Ora ku nan dos tabata so einan, Kain a dal su ruman Abel. El a dal e asina duru ku el a mat’é. Esei no tabata un kos teribel pa Kain hasi?

Ounke Abel a muri, Dios ta kòrd’é ainda. Abel tabata un bon hende, i Yehova nunka ta lubidá bon hende. P’esei, un dia Yehova Dios lo lanta Abel na bida atrobe. Na e tempu ei Abel lo no tin ku muri nunka mas. E por biba aki riba tera pa semper. Lo ta bon pa siña konosé hende manera Abel, no ta bèrdat?

Pero Dios no ta gusta hende manera Kain. P’esei, despues ku Kain a mata su ruman, Dios a kastig’é dor di mand’é leu for di otro miembro di su famia. Ora Kain a bai biba na otro parti di tera, el a bai ku un ruman muhé di dje, i el a bira su esposa.

Ku tempu Kain ku su esposa a kuminsá haña yu. Mas yu hòmber i yu muhé di Adam ku Eva a kasa, i nan tambe a haña yu. Pronto tabatin hopi hende riba tera. Laga nos siña tokante algun di nan.

Génesis 4:2-26; 1 Juan 3:11, 12; Juan 11:25.