WACHANIM chawilampeʼ ri Caín rukʼ ri Abel. Ri e kebʼ xekʼiyik. Ri Caín xubʼan ajtikoʼn. Ri uchak are kutik ri jalajoj uwäch täq su ktijowik.

Ri Abel kukʼiyisaj ri täq chij. Areʼ utz krilo kuchajej ri alaj täq chij. Wariʼ kekʼiyik tekʼuriʼ keʼubʼan nimaʼq täq chij, tekʼuriʼ kʼo jun nimalaj jupuq chij rukʼ ri Abel rech keʼuchajej.

Pa jun qʼij ri Caín xuqujeʼ ri Abel xkekʼam bʼi jun sipanik che ri Ajawaxel. Ri Caín xukʼam bʼi ronojel uwäch täq utikoʼn. Tekʼuriʼ ri Abel xukʼam bʼi jun utzalaj chij. Ri Jehová utz xril ri Abel xuqujeʼ ri usipanik. Tekʼuriʼ utz ta xril ri Caín xuqujeʼ ri usipanik. ¿Awetaʼm suche?

Are ta rumal che ri usipanik ri Abel qas utz chuwäch ri usipanik ri Caín. Are rumal che ri Abel jun utzalaj winaq. Sibʼalaj kraj ri Ajawaxel xuqujeʼ ri rachalal. Jet kʼut ri Caín che itzel; kraj ta ri rachalal.

Rumal laʼ ri Ajawaxel xubʼij che ri Caín che rajawaxik kukʼex ri unoʼj (kujal uchʼobʼnik). Ri Caín xunimaj ta kʼut ri Ajawaxel. Sibʼalaj petinäq royowal rumal che ri Ajawaxel are utz xril ri usipanik ri Abel. Ri Caín xubʼij che ri Abel: ‹Joʼ jelaʼ pa ri juyubʼ›. Chiʼ e kʼo chilaʼ kitikel, ri Caín xuchʼay ri Abel. Sibʼalaj ko xuchʼayo, xa rumal waʼ che xukamsaj. ¿Su kabʼij at chirij wajun nim itzelal che xubʼan ri Caín che ri Abel?

Xsach ta ri Abel pa ujolom ri Ajawaxel chiʼ ri Abel kamnäq chik. Rumal che ri Abel jun utzalaj winaq, xuqujeʼ ri Jehová kusach ta pa ujolom ri winaq che e utz. Rumal waʼ kopan jun qʼij che ri Jehová kuya ri ukʼaslemal ri Abel. Xa jewaʼ riʼ ri Abel kkäm ta chik. Kuriq na jun ukʼaslemal che kʼot ukʼisik cho ruwäch Ulew. ¿La utz kqetaʼmaj kiwäch winaq junam rukʼ ri Abel?

Ri Ajawaxel utz täj kril ri winaq junam rukʼ ri Caín. Rumal laʼ, chiʼ ri Caín xukamsaj ri Abel, ri Ajawaxel xutaq bʼi naj chike ri ufamilia. Chiʼ ri Caín xbʼe naj xukʼam bʼi jun ranabʼ, rech xubʼan rixoqil che.

Qʼaxnäq chi ri qʼij ri Caín xkʼejeʼ ralkʼwal rukʼ rixoqil. Ri nikʼaj chik kalkʼwal ri Adán rukʼ ri Eva xekʼuleʼik xuqujeʼ xekʼojiʼ kalkʼwal. Tekʼuriʼ xkebʼan kʼi ri winaq cho ruwäch Ulew. Chqetaʼmaj kiwäch nikʼaj.