QAWAY Cainta hinaspa Abelta. Wiñaramusqakuña. Cainmi chakrapi llamkaq karqa. Chakrapi llamkaspanmi kawsaykunata, frutakunata hinaspa verdurakunata tarpurqa.

Abelñataqmi ovejakunata uywarqa. Payqa chitachakunatam kuyan. Chitachakuna wiñaruspan ovejakunaña kanku, hinaptinmi Abelpa ovejankunaqa hatajontinña karqa cuidananpaq.

Huk punchawmi Cainwan Abelqa regalota Diosman aparqaku. Cainmi tarpusqan kawsaykunata aparqa. Abelñataq ovejankunamanta allinneqchantam aparqa. Jehová Diosmi Abelpa regalonta chaskiykurqa. Cainpataqa manam chaskirqachu. ¿Yachankichu imanasqataq chayna karqa?

Manam Abelpa regalon allin kasqanraykullachu. Allin runa kasqanraykum. Payqa Jehová Diostam hinaspa wawqenta kuyarqa. Cainñataqmi wawqentapas cheqnispa mana kuyakuq runa karqa.

Chaymi Cainta Diosqa nirqa allintaña rurananpaq. Payñataq manam uyarikurqachu. Sinchita piñakururqa Abelpa qosqanta Dios chaskiruptin. Chaymi Cain wawqen Abelta nirqa: ‘Hakuchik purikuq’ nispa. Chakrapi iskayllanku kachkaptinku, wawqen Abelta Cain maqasqa. Llumpayta maqaruspanmi wañurachirqa. ¿Manachu llakikunapaq kanman Cainpa rurasqanqa?

Abel wañuruptinpas, Diosqa hinallaraqmi paytaqa yuyarichkan. Abelqa allin ruraq runam karqa, chayna runakunataqa Jehová Diosqa manam qonqanmanchu. Chaymi Jehová Dios hamuq tiempopi Abelta kawsarichimunqa. Chay tiempopiqa Abelqa manañam wañunqachu. Aswanqa wiñaypaqñam Allpapi kawsakunqa. ¿Manachu munachwan chayna runakunata reqsiyta?

Jehová Diosqa manam kuyanchu Cain hina runakunataqa. Wawqenta wañurachiptinmi, Diosqa ayllunmanta karuta pasarachispam castigarqa. Warmin kananpaq paninta pusarikuspam Cainqa pasakurqa.

Tiempopa risqanman hina Cainpa churinkunaqa naceyta qallaykurqa. Adanpa wakin churinkunapas casarakuruptinku paykunapa churinkunapas nacerqa. Chaymi Allpapiqa runakuna mirarurqa. Reqsisunchikyá wakinkunata.