KUNEETI Qayeelinna Abeeli lai. Xa lamunku lophphitino. Qayeeli baatto loosirannoha ikki. Gide, addi addi laalonna akaakilte loosiranno.

Abeeli gereewo cei. Isino shiimmaadda wiliiˈle allaaˈla baxanno. Wiliiˈluno lophphe jajjabba gereewo ikki; konni daafira Abeelira allaaˈlanno gereewi mulenni hoshsha ikkisi.

Mitto barra Qayeelinna Abeeli Maganoho kakkalo shiqishshu. Qayeeli baatto loosire fushshirino laalchi giddonni shiqishi. Abeeli kayinni gereewisi giddonni dancha doore shiqishi. Abeelinna kakkalosinni Yihowa hagiidhino. Qayeelinna kakkalosi kayinni dihagiirsiissinosi. Mayiraatiro afootto?

Abeeli kakkalo Qayeelitenni roortino daafira diˈˈikkino. Abeeli dancha beetto ikkinohuraati. Isi Yihowano rodoosino baxanno. Qayeeli kayinni bushaho; qoleno rodoosi dibaxanno.

Konni daafira Maganu Qayeeli busha ikkitanni nootto yiisi. Isi kayinni yiinosita macciishsha giwi. Maganu Abeeli roorse baxino daafira Qayeeli lowo geeshsha hanqi. Konni daafira Qayeeli Abeeli, ‘Xawo hinge haˈno’ yii. Xawoho lamunku calla heedheenna rodoosi Abeeli gani. Lowo geeshsha ganinosi daafira Abeeli reyi. Qayeeli assinori busha coye diˈˈikkino?

Abeeli reyiha ikkirono, Maganu xaa geeshsha dihawinosi. Abeeli dancha beettooti; Yihowa qole hattoo manna horonta dihawanno. Konni daafira mitto barra Yihowa Abeeli galagale heeshshote heeˈranno gede assannosi. Hatte yannara Abeeli horonta direyaanno. Tenne uulla aana hegerera heeˈranno. Abeeli gedee manni ledo egennama dancha diˈˈikkitino?

Ikkollana Qayeeli gedee manni Magano dihagiirsiisanno. Konni daafira Qayeeli rodoosi shiihu gedensaanni, ayiiddisiwiinni baxxe fafo gobba haˈranno gede asse Maganu qorichchishinosi. Qayeeli wole gobba haˈri wote, meya roduuwisi giddonni mitte adhe haˈri; iseno galtesi ikkitu.

Gedensaannino Qayeelinna galtesi ooso iltu. Addaaminna Heewaniti wole labballunna meya oosono kuˈu kuˈuyi ledo adhante ooso iltu. Mulenni uullate aana noo manni lowoha ikki. Hanni mitu mitu mannire laˈno.