BUKA boKhayini na-Abela nyalo. Bobabili sebakhulile. Khayini ungumlimi, ulima lokuluhlavu, titselo netibhidvo.

Abela yena ungumelusi wetimvu. Uyakutsandza kunakekela emazinyane ato. Ayakhula abe timvu letindzala, bese uba nemhlambi lomkhulu wetimvu lokufanele aweluse.

Ngalelinye lilanga Khayini na-Abela baletsa iminikelo kuNkulunkulu. Khayini waletsa umnikelo wetitselo latilimako, Abela yena waletsa timvu takhe letikhuluphele. Jehova wanaka-Abela nemnikelo wakhe, kepha Khayini nemnikelo wakhe akazange amnake. Uyasati yini sizatfu lesenta Jehova wenta loko?

Akusho kutsi umnikelo wa-Abela wawuncono kunewaKhayini. Kodvwa kungenca yekutsi Abela abeyindvodza lelungile; abetsandza Jehova, atsandza naKhayini. Khayini yena abengakalungi, ngoba abengamtsandzi umnakabo.

Nkulunkulu watjela Khayini kutsi ayekele kwenta lokungakalungi, kodvwa akalalelanga. Ngako Khayini watfukutsela kakhulu nakabona kutsi Nkulunkulu utsandza Abela kunaye. Wase utsi ku-Abela umnakabo: ‘Asambe, siye esigangeni.’ Batsi nabefika esigangeni, Khayini wesukela umnakabo wamshaya kabuhlungu wambulala. Kwakungesiyo yini intfo lembi lena leyentiwa nguKhayini?

Nanobe nje Abela afa, kodvwa usekhona enkhumbulweni yaNkulunkulu. Nkulunkulu Jehova akabakhohlwa bantfu labalungile njenga-Abela, kungako nje ngalelinye lilanga atamvusa ekufeni. Ngaleso sikhatsi Abela angeke asafa, utawuphila phakadze emhlabeni. Angeke kujabulise yini kwati umuntfu lonjenga-Abela?

Nkulunkulu akabatsandzi bantfu labanjengaKhayini. Ngemuva kwekuba Khayini abulele Abela, Nkulunkulu wamjezisa ngekutsi amsuse ambeke khashane nemndeni wakubo. Ngalesikhatsi Khayini ahamba aya eveni lelikhashane, watsatsa lomunye wabosisi bakhe wamenta umfati wakhe.

Ngekuhamba kwesikhatsi Khayini nemfati wakhe baba nebantfwana. Nalamanye emadvodzana nemadvodzakati abo-Adamu na-Eva ashada futsi nawo aba nebantfwana. Ngekushesha umhlaba waba nebantfu labanyenti. Ase sifundze ngalabanye babo.