SIO ange kia Keini mo ‘Ēpeli. Kuó na lalahi. Na‘e hoko ‘a Keini ko ha tokotaha faama. Na‘á ne tō ‘a e fa‘ahinga ‘akau ‘o hangē ko e uite, ‘akau fua mo e vesitapolo.

Na‘e hoko ‘a ‘Ēpeli ko ha tokotaha tauhi-sipi. Na‘á ne sai‘ia ke tokanga‘i ‘a e fanga ki‘i lamí. Na‘a nau tupu hake ‘o hoko ko e fanga sipi lalahi, ko ia na‘e ‘ikai fuoloa kuo ma‘u ‘e ‘Ēpeli ha tākanga sipi ke ne tokanga‘i.

‘I he ‘aho ‘e taha na‘e fai ‘a e foaki me‘a‘ofa ‘e Keini mo ‘Ēpeli ki he ‘Otuá. Na‘e ‘omai ‘e Keini ‘a e ngaahi fua mei he ngoue na‘á ne toó. Pea na‘e ‘omai ‘e ‘Ēpeli ‘a e sipi lelei taha na‘á ne ma‘ú. Na‘e fiemālie ‘a Sihova ‘ia ‘Ēpeli mo ‘ene me‘a‘ofá. Ka na‘e ‘ikai ke fiemālie ia kia Keini mo ‘ene me‘a‘ofá. ‘Okú ke ‘ilo hono ‘uhingá?

Na‘e ‘ikai ke ngata pē ‘i he lelei ange ‘a e me‘a‘ofa ‘a ‘Ēpelí ‘i he me‘a‘ofa ‘a Keiní. Ko hono ‘uhingá he ko ‘Ēpeli ko e tangata lelei. Na‘á ne ‘ofa kia Sihova pea mo hono tokouá. Ka na‘e kovi ‘a Keini; na‘e ‘ikai ‘ofa ia ki hono tokouá.

Ko ia na‘e tala ‘e he ‘Otuá kia Keini ‘oku totonu ke liliu ‘ene ngaahi foungá. Ka na‘e ‘ikai ke tokanga ki ai ‘a Keini. Na‘á ne ‘ita lahi koe‘uhi he na‘e sai‘ia ange ‘a e ‘Otuá ‘ia ‘Ēpeli. Ko ia na‘e tala ange ‘e Keini kia ‘Ēpeli, ‘⁠Ha‘u ke ta ō ki ‘uta.’ ‘I he‘ena ‘i ai toko ua pē, na‘e taa‘i ‘e Keini hono tokoua ko ‘Ēpelí. Na‘á ne taa‘i lahi ‘o ne mate ai. ‘Ikai ko ha me‘a fakalilifu ‘eni ke fai ‘e Keini?

Neongo na‘e mate ‘a ‘Ēpeli, ‘oku kei manatu‘i pē ia ‘e he ‘Otuá. Na‘e lelei ‘a ‘Ēpeli, pea he‘ikai ‘aupito ke ngalo ha tangata pehē ‘ia Sihova. Ko ia ‘e ‘i ai ha ‘aho ‘e toe fakafoki mo‘ui mai ‘a ‘Ēpeli ‘e Sihova ko e ‘Otuá. ‘I he taimi ko iá he‘ikai ‘aupito ke toe mate ‘a ‘Ēpeli ia. ‘E lava ke ne mo‘ui ‘i heni ‘i he māmaní ‘o ta‘engata. ‘Ikai ‘e hoko ko e me‘a lelei ke hoko ‘o maheni mo e fa‘ahinga ‘o hangē ko ‘Ēpelí?

Ka ‘oku ‘ikai ke fiemālie ‘a e ‘Otuá ki he fa‘ahinga ‘o hangē ko Keiní. Ko ia ‘i he ‘osi hono tāmate‘i ‘e Keini ‘a hono tokouá, na‘e tautea ia ‘e he ‘Otuá ‘aki hono fekau ia ke ‘alu ki he feitu‘u mama‘o mei he toenga ‘o e fāmilí. ‘I he ‘alu ‘a Keini ‘o nofo ‘i he feitu‘u kehe ia ‘o e māmaní, na‘á ne ‘alu mo e taha ‘o hono ngaahi tuofāfiné, pea na‘e hoko ia ko hono uaifi.

Faifai atu pē na‘e kamata ke ma‘u ‘e Keini mo hono uaifí ha fānau. Ko e ngaahi foha mo e ngaahi ‘ofefine kehe ‘o ‘Ātama mo ‘Iví na‘a nau mali, pea nau toe ma‘u mo e fānau. Na‘e ‘ikai ke fu‘u fuoloa kuo tokolahi ‘a e kakai he māmaní. Tau ako ange ‘o fekau‘aki mo ha ni‘ihi ‘o kinautolu.