KʼELAWIL ja weʼgo ja Caín soka Abeli. Xchawanile kʼiyeta. Ja Caini jun winik wa x-aʼti bʼa alaj. Ja yeʼn wa stsʼunu tuktukil tikʼe inat.

Ja Abeli jun winik wa stalnay chej. Ja yeʼn wa skʼulan gusto stalnajel ja yal cheji. Ja chejik jumasaʼ it wa xkʼiye sok weʼgoxta wa xjitsanbʼi el ja chej wa stalnay ja Abeli.

Jun kʼakʼu ja Caín soka Abeli skʼapawe yiʼ majtanal ja Dyosi. Ja Caini yijan jujuntik jas junuk stsʼununej ja bʼa yalaji, jaxa Abeli wa xyijan ja yal xchej mas lek yiʼoji. Ja Jyoba lek wa xyila ja Abeli soka smajtan yiʼojani. Pe mi lek xyila ja Caini soka smajtan yiʼojani. ¿Wan maʼ xa naʼa jas yuj?

Mi jaʼuk yuj ja majtanal yiʼojan ja Abeli mas lek yuj ja bʼa Caini. Yujni ja Abeli jun lekil winik. Ja yeʼn wani syajtay ja Jyobaji sok cha jachuk ja sbʼankili. Pe ja Caini jun winik mi lekuk; ja yeʼn mi skʼana ja yijtsʼini.

Ja Dyosi yala yabʼ ja Caini a-stukbʼes ja smodo. Pe ja Caini mini smaklaya, ja yeʼn jel tajki yuj ja Dyosi ja mas lek yila ja Abeli. Anto ja Caini ti yala yabʼ ja Abeli: «Wajtik bʼa jobʼ». Anto, yajni stuchʼileʼi, ja Caini juneta yaʼ yi ja Abeli. Ja yeʼn jel tsats yaʼ yi juntiro ja yuj ja Abeli chami. ¿Mi maʼ jel kistaluk ja jas skʼulan ja Caini?

Anke ja Abeli chami, ja Dyosi tʼabʼantoni skʼujola. Ja Abeli waj jun lekil winik, jaxa ja Jyobaji mini xchʼay skʼujol ja matik jastal yeʼn. Oj kʼotuk ja skʼakʼujili ja Jyobaji oj ya sakʼwuk jan ja Abeli. Ja bʼa tyempo jaw ja Abeli mixani oj chamuka. Ja yeʼn ojni bʼobʼ ajyuk sakʼan tolabida ja bʼa Luʼumi. ¿Mi maʼ jel lekuk snajel sbʼaj ixuk winike jastal Abel?

Pe ja Dyosi mini lek xyila ja matik jastal Caini. Tsaʼan, yajni ja Caini smila ja yijtsʼini, ja Dyosi mixa ti ya ajyuk sok ja spamilya, sjeka najat lek. Jachuk ja Caini waj kulan bʼa pilan lugar ja bʼa Luʼumi sok yiʼaj smok june ja bʼa spamilya ixuki, ja yeʼn paxi jastal xcheʼum.

Ekʼ ja tyempo ja Caín soka xcheʼumi kʼe ajyuk yuntikile. Tuk skeremtik sok yakʼixuk ja Adán soka Eva nupaniye, jaxa yeʼnleʼi cha kʼe ajyuk yuntikile. Weʼgoxtani jel ajyi ixuk winik ja bʼa Luʼumi. La jnatik sbʼaje jujuntik.