KAʼAKXILHTI Caín chu Abel. Xchatiykan lakstakkgolha. Caín chananan. Caín chan talhtsi chu lakgkgama tuku wakan chu tuku litlawakan liwat.

Abel makgastaka borregos. Abel lu lakgatiy kuentajtlaway xalaktsu borrego. Umakgolh stakkgoy chu lu laklanka wankgoy, chu lakapara Abel kgalhiy lhuwa xborregos nema kuentajtlaway.

Akgtum kilhtamaku Caín chu Abel linikgolh akgtum tamakamastan Dios. Caín linilh tamakamastan Dios nema xmakgalanit. Chu Abel lilh nema tlakg xatlan borrego nema xkgalhiy. Jehová tlan akxilha Abel chu xtamakamastan. Pero nitlan akxilha Caín chu xtamakamastan. ¿Katsiya wix tuku xlakata?

Dios tlan akxilhli Abel pero nikajwatiya xlakata xtamakamastan tlakg xatlan xwanit nixawa xla Caín. Jehová lakgatilh xtamakamastan Abel xlakata xla tlan likatsiy. Paxkiy Jehová chu na paxkiy xtala. Pero Caín nitlan likatsiy; ni paxkiy xtala.

Wa xlakata Dios waniy Caín pi nialh chuna kalilh xtayat. Pero Caín ni kgaxmatli. Chu lu sitsinit xlakata Dios ni makglhtinalh xtamakamastan wata makgamakglhtinalh xtamakamastan Abel. Caín wani Abel: Kaw kkakiwin. Chu anta akxni xakstukan xwilakgolh, Caín wilini xtala. Lu tliwakga nikaʼ chu makgniy. Lu lanka nitlan tuku tlawalh Caín, ¿nichuna?

Maski Abel nilh, Dios lakapastakaku. Abel lu tlan xlikatsiy chu Jehová nikxni kapatsankga tiku tlan likatsiy. Nachan kilhtamaku akxni Dios Jehová namalatamanipara Abel. Akxni tama kilhtamaku Abel nialh akxni katinilh. Tlan nalatamay unu kKatiyatni chu nikxni katinilh. Lu tlan xkalakgapaswi kristianos la Abel, ¿ni chuna?

Pero Dios nitlan kaʼakxilha tiku la Caín. Wa xlakata akxni Caín makgnilh xtala Abel, Dios makgat malakgachalh chu nialhla katatawi xfamilia. Akxni Caín makgat alh tawilay, lilh chatum xtalatsumat, chu xpuskat tlawalh.

Alh kilhtamaku Caín chu xpuskat tsukukgolh kgalhikgoy xkamanan. Amakgapitsi xlakgkgawasan chu xlaktsuman Adán chu Eva latatamakgaxtokgkgolh chu kgalhikgolh xkamanankan. Ni makgas alh kilhtamaku analh lhuwa kristianos kKatiyatni. Kakalakgapaswi makgapitsi.