WONA Kayini na Abelu. Wose ŵakura. Kayini ni mulimi. Wakulima vya mphuzi na vipasi ndiposo mphangwe.

Abelu ni muliska wa mberere. Wakutemwa kupwelelera twana twa mberere. Mberere zake zakura, ndipo Abelu wali na mberere zinandi zakuti wapwelelere.

Zuŵa linyake Abelu na Kayini ŵakiza na cawanangwa kwa Ciuta. Kayini wakiza na vyakurya ivyo wakalima. Abelu wakiza na mberere yiwemi comene kuluska zose izo wakaŵa nazo. Yehova wakakondwa na Abelu na cawanangwa cake. Kweni wakakondwa yayi na Kayini na cawanangwa cake. Kasi ukumanya cifukwa cake?

Kuti nchifukwa cakuti cawanangwa ca Abelu cikaŵa ciwemi kuluska ca Kayini cara. Kweni nchifukwa cakuti Abelu wakaŵa munthu muwemi. Wakatemwanga Yehova ndiposo mukuru wake. Kweni Kayini wakaŵa muheni; wakatemwanga munung’una wake yayi.

Mwantheura Ciuta wakaphalira Kayini kuti wakwenera kusintha nkharo yake. Kweni Kayini wakapulikira yayi. Wakakwiya comene cifukwa Ciuta wakatemwa Abelu kuluska iyo. Ntheura Kayini wakaphalira Abelu kuti, ‘Tiye tilute ku munda.’ Ŵali ku munda, uko ŵakaŵa ŵekha, Kayini wakatimba munung’una wake Abelu. Wakamutimba comene mupaka kumukoma. Kasi cikaŵa cinthu cakofya yayi ico Kayini wakacita?

Nangauli Abelu wali kufwa, kweni Ciuta wacali kumukumbuka. Abelu wakaŵa muwemi, ndipo Yehova wakuluwa cara munthu muwemi wa nga ni uyu. Mwantheura zuŵa linyake Yehova Ciuta wazamuwezgeraso Abelu ku umoyo. Pa nyengo iyo, Abelu wazamufwaso cara. Wazamukhala pa caru capasi kwamuyirayira. Kasi cizamuŵa cinthu ciwemi yayi kumanyana na ŵanthu ŵa nga ni Abelu?

Kweni Ciuta wakukondwa yayi na ŵanthu ŵa nga ni Kayini. Mwantheura Kayini wakati wakoma munung’una wake, Ciuta wakamulanga mwa kumucimbizgira kutali na mbumba yake. Apo Kayini wakalutanga kukakhala ku malo ghanyake, wakatora yumoza wa ŵadumbu ŵake, ndipo wakaŵa muwoli wake.

Mukuluta kwa nyengo Kayini na muwoli wake ŵakayamba kubaba ŵana. Ŵana ŵanyake ŵanalume na ŵanakazi ŵa Adamu na Heva ŵakatora na kutengwa, ndipo nawoso ŵakaŵa na ŵana. Mwambura kucedwa pa caru pakaŵa ŵanthu ŵanandi. Tiye tisambire za ŵanyake ŵa iwo.