Tantara 6

Kaina Ndreky Abela

ZAHAVA Kaina ndreky Abela eto. Samy efa lelahy be irô. Kaina nanjary mpambôly. Izy namboly vary, manga, ndreky an̈ana.

Abela nanjary mpiambin̈y ôndrikôndriky. Tiany mitarimy zanaka ôndrikôndriky. Manjary be irô io, ke naro amy zay ôndrikôndriky tariminy.

Andra araiky, Kaina ndreky Abela nitaondra raha namian̈a Zan̈ahary. Kaina nitaondra raha sasany boaka tamy raha natsabony. Abela nitaondra ôndrikôndrikinany araiky farany tsara. Jehovah tia Abela ndreky raha namiany. Izy tsy tia Kaina ndreky raha namiany. Hainao ino antony?

Tsy raha namian’i Kaina ratsy toizay nin’Abela, fa Abela tsara fan̈ahy. Izy tia Jehovah ndreky tia rahalahiny. Kaina ratsy fan̈ahy. Izy tsy tia rahalahiny.

Zan̈ahary nivolan̈a tamy Kaina, hiala amy jerinany ratsy. Kaina tsy nijery zen̈y. Izy neloko farany mare, fôtony Jehovah tia Abela. Kaina baka iô nivolan̈a tamin’Abela: ‘Alô atsika andeha hizaha tsabo an̈y.’ Izikoa fa irô’roe fo tan̈y, nivangoen’i Kaina mare Abela, baka tiô naty. Ratsy mare raha nataon’i Kaina, tsy zen̈y?

Ndray Abela naty, Zan̈ahary mahatsiaro izy fo. Abela tsara fan̈ahy. Zan̈ahary tsy mety man̈adin̈a olo karaha zen̈y. Andra araiky an̈y, Zan̈ahary Jehovah mbala hamelon̈o Abela. Amy zen̈y, Abela tsy hofoaty eky, fa ho velon̈o tsisy farany ambony tany eto. Tsy mba tianao hahay olo tsara fan̈ahy karaha Abela?

Zan̈ahary tsy tia olo ratsy fan̈ahy miran̈a Kaina. Nisazin’i Jehovah Kaina, nirahiny niala ry havany. Kaina koa fa nandeha, nindesiny niaraka taminany anabaviny araiky, baka iô nanjary vadiny.

Koa fa ela ny ela, irô nanan-janaka. Zanaka Adama ndreky Eva sasany koa nifanambady, ke niteraka maro. Tsy ela, naro be olo tambony tany teto. Atsika iziô hianatra sasany amin-drô.

Genesisy 4:2-26; 1 Jaona 3:11, 12; Jaona 11:25.