SAMBANO ŵalole Kaini ni Abele. Wosopewo akusile. Kaini sambano ali namalima. Akusalima yisogosi ni liponda.

Abele ali jwakulanga ngondolo. Akusanonyela kusamalila tuŵanace twangondolo. Tukusakulaga ni kuŵa ngondolo syekulungwakulungwa, Abele sambano akwete ngondolo syejinji syakusilolela.

Lisiku line Kaini ni Abele ŵapelekaga mtuka kwa Mlungu. Kaini ŵajigele yakulya yaŵalimaga. Abele ŵajigele ngondolo jambone mnope pa ngondolo syaŵakwetesyo. Yehofa ŵasangalele ni mtuka waŵajigele Abele. Nambo nganasangalala ni mtuka waŵajigele Kaini. Ana akumanyilila ligongo lyakwe?

Ngaŵa kuti mtuka wa Abele waliji wambone mnope kupundana ni wa Kaini. Nambo lili ligongo lyakuti Abele ŵaliji mundu jwambone. Jwalakwe ŵamnonyelaga Yehofa, soni mkulugwejo. Nambo Kaini, ŵaliji mundu jwakusakala, soni jwangamnonyela mpwakwejo.

Sambano Mlungu ŵamsalile Kaini kuti asinde yitendo yakwe. Nambo Kaini nganapikanila. Jwalakwe ŵatumbile mnope ligongo lyakuti Mlungu ŵamnonyele mnope Abele. Kaneko Kaini ŵamsalile Abele kuti, ‘kwende tujawule kumigunda.’ Kweleko, pakuŵa jemanjajo ŵaliji ŵaŵilipe, Kaini ŵamputile Abele mpwakwe. Ŵamputile mnope mpaka kum’wulaga. Ana yeleyi Kaini nganiyimjogoya kuyitenda?

Atamose kuti Abele ŵawile, nambope Mlungu akusamkumbucilaga. Abele ŵaliji mundu jwambone, ni Yehofa ngakusamliŵalila mundu jwati mpela jweleju. Lisiku line Mlungu cacimjimusya Abele kuti aŵesoni ni umi. Pandaŵi jelejo Abele ngasawasoni. Jwalakwe cacikomboleka kutamaga pacilambo capasi kwangamala. Ana ngasiyiŵa yakusangalasya kwamanyilila ŵandu mpela Abele?

Nambo Mlungu jwangasangalala ni ŵandu ŵampela Kaini. Ni Kaini paŵagambile kum’wulaga mpwakwe, Mlungu ŵampele cilango mwakumtopola kuti akatameje kwakutalicilana mnope ni acalongo acimjakwe. Paŵajawulaga kucilambo cakutalicila kula, jwalakwe ŵaliji yimpepe ni mlumbugwe. Ni mlumbugweju ŵaŵele ŵamkwakwe.

Pajapitaga ndaŵi Kaini ni ŵamkwakwe ŵala ŵatandite kola ŵanace. Ŵanace ŵacilume, soni ŵacikongwe ŵa Adamu ni Hawa ŵalombene. Ni nombe nawo ŵakwete ŵanace. Ni ŵandu ŵatupile mwacitema pacilambo capasi. Kwende tulijiganye ya ŵane mwa ŵanduŵa.