BEOORAAʼ ilawil Caín yéetel Abel. Tu kaʼatúulal tsʼoʼok u nuuktaloʼob. Caineʼ tsʼoʼok u beetkuba j-kolnáalil. Letiʼeʼ ku pakʼik janalbeʼen baʼaloʼob.

Abeleʼ tu beetuba j-kanan tamanil. Letiʼeʼ utstutʼaan u kanáantik mejen tamanoʼob. Leloʼobaʼ ku nukuch tamanchajloʼob; maʼ xáanchaj ka yanchaj tiʼ Abel u múuchʼ tamanoʼob u tséentiʼ.

Upʼéel kʼiineʼ Caín yéetel Abeleʼ tu bisoʼob upʼéel siibal tiʼ Dios. Caineʼ tu bisaj u yich u paakʼal. Abeleʼ tu bisaj u maas tʼaʼajil u yaalakʼ. Tiʼ Jéeobaeʼ lúub utsil Abel, bey xan u siibal. Baʼaleʼ, maʼ lúub utsil Caín tiʼiʼ, mix u siibal. ¿A wojel wa baʼaxten?

Maʼ tumen wa maas maʼalob u siibal Abel tiʼ u siibal Cainiʼ, tumen Abeleʼ uts, u yaabilma Jéeoba bey xan Caín. Baʼaleʼ, Caineʼ kʼasaʼan maʼ u yaabilma u yíitsʼniʼ.

Le oʼolaleʼ, Dioseʼ tiaʼalaj tiʼ Caín kʼaʼabéet u kʼexik u tuukul. Baʼaleʼ, Caineʼ maʼ tu beetiʼ. Jach pʼuʼuji tumen Dioseʼ u maas yaabilma Abel. Caineʼ tiaʼalaj tiʼ Abel: Koʼox teʼ kʼáaxoʼ. Teʼeloʼ, le ka pʼáat chéen tu junaloʼobeʼ, Caineʼ tu nóokjatsʼtaj u yíitsʼin. Jach chich úuchik u jatsʼik le oʼolal tu kíimsaj. ¿Maʼ wa kʼaas a wilik le baʼax tu beetaj Cainoʼ?

Kex tumen kíim Abeleʼ, láayliʼ ku kʼaʼajsaʼal tumen Dioseʼ. Abeleʼ uts kaʼachi, Jéeobaeʼ mix bikʼin u tuʼubsik máakoʼob jeʼex Abeleʼ. Le beetkeʼ yaan u kaʼa kuxkíintaʼal Abel tumen Jéeoba Dios. Abeleʼ maʼ kun kaʼa kíimil. Yaan u kuxtal mantatsʼ way Luʼumeʼ. ¿Máasaʼ maʼalob ka kʼuchkoʼon k-kʼaj óolt máakoʼob jeʼex Abeloʼ?

Baʼaleʼ, máakoʼob jeʼex Caineʼ maʼatech u lúubul utsil tiʼ Dios. Le oʼolaleʼ, le ka tsʼoʼok u kíimsik u yíitsʼnoʼ, tojolchʼintaʼab tumen Dios. Le ka túun bin Caín kuxtal táanxel tuʼuxoʼ tu bisaj utúul u x-chʼupul íitsʼin, letiʼ kʼuch u beetubaj u yatan.

Ku máan kʼiineʼ Caín yéetel u yataneʼ káaj u yantal u paalaloʼob. U maasil u xibil paalal yéetel u x-chʼupul paalal Adán yéetel Evaeʼ tsʼoʼok xan u beeloʼob, letiʼob xaneʼ yanchaj u paalaloʼob. Maʼ xáanchaj ka yaʼabchaj máakoʼob way Luʼumeʼ. Koʼox kʼaj óoltik wa jaytúuloʼobiʼ.