SAMTANG ang gidaghanon sa katawhan misugod sa pag-uswag sa yuta, ang kadaghanan kanila nagbuhat ug daotan sama kang Cain. Apan may usa ka tawong lahi. Kini mao ang tawong ginganlan si Enoch. Si Enoch usa ka maisog nga tawo. Siya padayong nag-alagad sa Diyos.

Nahibalo ka bag ngano kadtong mga tawhana kaniadto naghimo sa daghan kaayong daotang butang? Buweno, palandonga, Kinsay mipahinabo kang Adan ug Eva nga mosukol sa Diyos? Oo, mao ang usa ka daotang manulunda. Ang Bibliya nagtawag kaniyang Satanas. Buot niyang ang tanan madaotan.

Usa ka adlaw si Jehova nga Diyos nagsugo kang Enoch sa pagsulti sa katawhan sa butang wala nila kagustohing paminawan. Mao kini: ‘May adlaw ra ang Diyos molaglag sa tanan daotang tawo.’ Ang katawhan lagmit nasuko kaayo sa pagkadungog niini. Busa gikinahanglang si Enoch magmaisog.

Wala tugti sa Diyos si Enoch nga mabuhig dugayng panahon taliwala sa daotang katawhan. Si Enoch nabuhi lamang sa 365 ka tuig nga kagulangon. Siempre, ang mga tawo niadtong mga adlawa nabuhing mas taas pa kay kanilang nabuhi karon. Ngani, ang anak lalaki ni Enoch si Mathusalam nag-edad ug 969 ka tuig!

Buweno, human si Enoch namatay, ang katawhan nagkangil-ad pa gayod. Ang Bibliya nag-ingon nga ‘ang yuta napuno sa kapintasan.’

Nahibalo ka ba sa usa sa mga katarongan nganong may daghang kasamok niadtong mga adlawa? Kini tungod kang Satanas nga may usa ka bag-ong paagi nga pabuhaton ang katawhan ug daotang mga butang. Kita makakat-on mahitungod niini sa sunod.