VAWLEI cung ah minung an hung tam deuh lengmang tik ah, a tam bik cu Kain bantuk in a ṭha lo mi thil an tuah ve. Sihmanhsehlaw mi pa pakhat cu aa rak i phun dang. Amah cu hi Enok an ti mi pa hi a si. A pawngkam minung vialte cu a ṭha lo ngai mi thil an rak tuah dih. Asinain Enok cu Pathian kha a rak biak ṭhiamṭhiam ko.

Cu lio caan i mi hna nih cun a ṭha lo mi thil cu zeicah an rak tuah hnga na hngal maw? Aho nih dah Adam le Evi cu Pathian bia ngaih lo in Pathian nih ei hlah uh a ti mi thingthei kha a rak ei ter hna? Ruat hmanh. A si, a ṭha lo mi vancungmi nih a rak ei ter hna. Baibal nih amah cu Seitan tiah a ti. Amah nih cun mi vialte kha ṭhat ter lo awk ah aa rak zuam.

Nikhat cu Jehovah Pathian nih Enok kha mi hna an theih duh lo mi bia a rak chimh ter. Mah cucu hihi a si: ‘Nikhat khat cu Pathian nih mi ṭhalo vialte kha a hrawh dih te hna lai.’ Mi hna cu mah bia an theih tik ah cun an thin a rak hung ngaingai ko lai. Enok kha thah awk hmanh ah an rak i zuam men ko hnga. Cucaah mi hna kha Pathian nih a tuah te lai mi chimh awk ah cun Enok cu a ral a rak ṭhat a hau.

Pathian nih khi bantuk mi ṭhalo hna sin ah khan Enok cu caan saupi a rak nun ter lo. Enok cu kum 365 lawng a rak nung. Zeicah “kum 365 lawng” kan ti? Zeicahtiah khi can lio i mi hna cu atu chan minung nak in an rak thawng deuh ngaingai i, sau deuh pi an rak nung kho. Enok a fapa Methushelah hmanh kha kum 969 a rak nung.

Enok a thih hnu cun minung cu an rak sual chin lengmang. Baibal nih cun ‘an ruah mi kip a rak ṭha lo i,’ cun ‘vawlei cu zang-ennak in a rak khat,’ a ti.

Khi caan lio ah vawlei cung ah cu tluk in harnak a tamnak a sullam tampi lak i pakhat cu na hngal maw? Cucu Seitan nih minung kha a ṭha lo mi tuah awk ah hruainak lam thar pakhat a rak hman caah a si. Mah kong cu a vun chang mi ah kan cawn te lai.